Hemsereka Pêroyî ya DBPyî Çîgdeme Kiliçgun Uçar ard ziwan ke seba çareserîya meseleyanê Tirkîya û Rojhelatê Mîyanênî û haştîyêka mende rolê Rayber Apoyî zaf muhîm o û azadîya ey do bi girîngî ardimê prosesî bikera.
Hemsereka Pêroyî ya DBPyî Çîgdeme Kiliçgun Uçar derheqê meseleya kurdan, tedayanê vera çapemenîya azade, modelê Îdareyê Xoserî û pêvînayîşanê bi Rayber Apoyî de ANFyî rê qisey kerd.
Çîgdeme Kiliçgun Uçar îfade kerd ke Tirkîya de meseleyêka cidî ya huqûq û edaletî est a, operasyonê vera çepemenîye mojnenê ke îqtîdar verê meseleyan de zelal nîyo û vat ke îqtîdar verê demokratan de tehamul nêkeno coka hêrişê çapemenîye keno.
Çîgdeme Kiliçgun Uçar ard ziwan ke Rojhelato Mîyanên hem merkezê Şerê Dinya yê Hîrêyînî yo hem zî seba dewletanê ke wazenê hêzdar bibê warêko krîtîk o. Çîgdeme Kiliçgun Uçar bale ante ser ke seba Rojhelatê Mîyanên î modelo tewr raşt modelê Îdareyê Xoserî yê Rojawanî yo û vat: ''No model 13 serrî yo bi serkewtişî yeno caardene. Rixmê hêrişanê dewleta tirke zî no model seba haştîye xo îsbat keno. Hêrişê vera Rojawanî, bi taybetî hêrişê vera Awbendê Tişrînî nênê qebulkerdene. Nêbeno ke cuya azade ya ke Rojawan de awan bîya pêşkêşê sermaye bêra kerdene.''
Hemsereka Pêroyî ya DBPyî Çîgdeme Kiliçgun Uçar bale ante girîngîya pêvînayîşanê bi Rayber Apoyî û vat: ''Nîqaşê serê pêvînayîşan û prosesî resayê safhayêka newîye. Pêvînayîşê bi Birêz Ocalanî zaf girîng ê. Seba çareserîya meseleyanê Tirkîya û Rojhelatê Mîyanênî û haştîyêka mende rolê Birêz Ocalanî wayîrê girîngîya heyatî yo û azadîya ey do bi girîngî ardimê prosesî bikera. Ganî tecrîdê Îmraliyî biqedo ke Birêz Ocalan bi hawayêkê azadî qisey bikero û meseleyan çareser bikero.''
