Vervatoxa Meclîsê Cinîyan ê HDPyî Ayşe Acar Başarana ke ANFyî rê qisey kerd  ard ziwan ke serra 2021î de vera qezancanê cinîyan hêrişê tewr zafî ameyî kerdene û vat la vera naye têkoşînê cinîyan zî pîlêr bi.

Başarane vist vîrî ke zaf destkewteyê cinîyan ameyî xespkerdene û vat: ''Nafaqa ameye munaqeşekerdene, bi qanûnê înfazî sûcdarê vera cinîyan û domana ameyî veradayene, vera kurtajî şertê astenkerdişî ameyî, dezgehê cinîyan ameyî qefilnayene, bi hezaran cinîyî bi KHKyan ameyî îxraçkerdene, sîstemê hemserekîye ameye hedefgirewtene, zîndanî pê cinîyan ameyî dekerdene û tewr peynî de Pêkerdişê Îstanbulî ame betalkerdene. Goreyê zîhnîyetê AKPyî cinîyê keye de ganî xizmetê camêrdan bikerê û domanan bîyarê dinya. Îqtîdar semedo ke nayî bîdo ciwîyayene dîyanetî ra heta medya, hukmî ra heta polîsan heme rayîrî şuxulnayî.  Rejîmê yew merdimî wazeno cinîyî bîat bikerê.''

Başaranê bale ante zêdebîyayîşê hêrişê vera cinîyan ser û vat: ''Camêrdî hêrişê vera cinîyan xo rê sey heqî vînenî. Cinîya ke qet nas nêkenê zî kişenî. Goreyê îstatîstîkan cinîyî hetê merdimanê xo ra yenê kiştene la hinda camêrdî serê cinîyan ê xerîban de zî xo sey heqdarî vînenî û mudahaleyê ci kenê. No netîceya polîtîkayanê îqtîdarî yo. Îqtîdar bi vatiş û kerdişanê xo verê şîdetê serê cinîyan akeno. Mabênê îqtîdar û camêrdan de îtîfaqo fîkrî û fîlî esto. Xora Kurdîstan de nê polîtîkayê îqtîdarî bi destê hêzanê dewlete yenê caardene. Ma zanê ke sûcdarê ke unîformayinê nînê cezakerdene. Ma no eşkera serebûtê Îpeke Er de dî.

Başaranê vat: ''Kurdîstan de bi hewayêkê sîstematîkî polîtîkayê şerê taybetî yenê caardene. Bitaybetî vera cinîyan û ciwanan kayê leyminî yenê kaykerdene. Vînîkerdişê Gulîstane Doku, qetilkerdişê embaza ma Denîze Poyraz û xeylêk qewimîyayîşê bînî nê tesaduf nîyê. Îqtîdar wazeno cinîyan ê kurdan bêrêxistinkerde biverdo û hedef bigêro. Êyê ke têkoşîn kenê înan zî erzeno zîndan ke wa bîat bikerê. Zîndan de zî senî ke nimûneya Garîbe Gezer û Aysel Tugluk de yeno vînayene bi tecrîd û zextî şîdet yeno kerdene. Tepişteyê nêweşî zîndanan de mergî rê ameyî caverdayene. Bi hewayêke şikdarî dinayaya xo bedilnenê.''

Ayşe Acar Başaran qiseykerdişê xo pê nê vatişa qedîna: ''Çîyo xirab oyo ke yeno waştene ke komel zî bibo leteyêkê naye. Îqtîdar komelî manîpule keno ke bikerê hemparê sûcî. Komel seba ke bêveng memano beno hemparê nê sûcî. Ewro hem semedê şîdetê serê cinîyan hem zî semedê rewşa zîndanan yeno waştene ke rizayê komelî bêro girewtene. Îqtîdar xo ra do nêzdî ra şiro, eşkera yo ke helisîyayo. La keno ke pîya bi xo komelî zî bihelisno. Îqtîdarî şinî la eke komel bihelîsîyo no tehlukeyo pîl o. Ganî komel semedê hêrişê vera cinîyan û rewşa tepişteyan hîsgêr bo. Serra 2021î de rixmê heme zextan cinîyan têkoşînê xo peyser geme nêeşte. 2022 do bibo serra pîlkerdişê têkoşînê cinîyan. Ma do emser hem têkoşînî pîl bikerê hem zî hetê cinîyan ra ma do cuyeyêka newî înşa bikerê. Ma do gamanê verênen ê bedilnayîşê nê sîstemî bierzê. Ma do na serre paştdayîş û têkoşînê hemparî pîl bikerê. Serra newî do heme cinîyan rê azadîye bîyaro.''