Kampanyaya ''Semedê cînîyan edalet'' ya ke Meclîsê Cinîyan ê HDPyî 10ê sibate de daye destpêkerdene dewam kena. Vervatoxa Meclîsê Cinîyan Ayşe Acar Başarane derheqê kampanya de ANFyî rê qisey kerd.

Başarane vat: ''Dekewtişê serra 2021î de seba ke cepheyê cinîyan de têkoşîn bêro pîlkerdene ma  heme awanîyanê xo de tewir û metodanê hîna zaf rêxistinbîyayîşî ser o munaqeşe kerd û netîceya nayî de kampanyaya newîye daye destpêkerdene.

Xora ma tim netîceyanê polîtîkaya cînskî vînenî. Bi hezaran embazê ma têna seba ke têkoşînê cinîyan rayra berdo, çalakîyê 8ê Adare û 25ê Teşrîna Peyêne organîze kerdî yenê hukmkerdene. Cinîyan ke vat 'Pêkerdişê Îstanbulî dano ciwîyayene' û vejîyayî kuçeyan yenê hukmkerdene.

Reyna jan zî  sey bahaneyî ame şuxulnayene û şîyayîşê cinîyan ê keyeyanê ke şîdetî ra remenê şinê tede manenê ameyî astengkerdene û cinîyî şîdetî rê rî bi rî mendî. Cinîyan ke vera şîdetî heqê xo yo meşru yê xopawitişî şuxulna şexsê  Melek Îpek de pê hepsê muebetî yenê hukmkerdene. Hetê bînî ra înanê ke vera cinîyan sûcî kerdî pê bêcazayîye yenê xelatkerdene. Sey qanûnê înfazî pê efanê nimiteyan şîdetê camêrdan yeno meşrukerdene. Hukm seba edaletî nê vera muxalefetî sey çuyeyî yeno şuxulnayene.

Îqtîdar tecrîdê serê Rayberê Şarê Kurdî Abdullah Ocalanî heme welatî ra vila bîyo no zî bi bahaneyê janî xorîyêr kerd. Şer, krîzê ekonomî, tecrîd û feqîrîye tewr zaf cinîyan ser tesîr keno. Cuye, ameyox û azadîya cinîyan ser o tecrîdêko pîl yeno afernayene. No halê şerî, sey barkerdiş, feqîrîye û zîndanê peyser agêreno. Tepişteyî vera na bêhuqûqîye û tecrîdê ke meşru nîyo grevê vêşanîye de yê. No zî leteyêke kampanyaya ma yo.

Ma vînenî tecrîd cinîyan ser senî tesîr keno, ma do cinîyan ê tepişteyan ê sîyasîyan rê bibê veng. Rîyê sîstemê hemserekîye ra xeylêk embazê ma zîndan de yê. Nîmuneyo tewr hole yê nayî zî Şevîne Alaca ya. Dosyaya ci têna krîmîlalîzkerdişê hemserekîye ser o ameya amadekerdene. Nê caardişanê antîdemokratîkan û bêhuqûqîyan welat vistê mîyanê krîzê ekonomî. Coka ma na kampanya daye destpêkerdene.

Ma seba ke vengê cinîyan bikerê berz têkoşîn kenê. 8ê Adare beno nîzdî.  Heme dinya de semedê cinîyan wextê vejîyayîşê kuçeyan o. Ma sey Meclîsê Cinîyan ê HDPyî 1ê adare de xeylêk bajaran de sey hemwext do startê çalakîyan bidê. 5 adare de ma do sey meclîsî çalakîyan bikerê û 8ê Adare de zî Tirkya û Kurdîstan de pîya bi dezgehanê cinîyan ê bînan çalakîyan bikerê. Ma do serewedaritişê xo berz bikerê. Ma do nê 8ê Adare de reyna biqîrê û vajê têkoşînê ma do ser bikewo.''