Vervatoxa Meclîsê Cinîyan ê HDPyî Ayşe Acar Başaran kombîyayîşê çapemenîye de rojdemê cinîyan û welatî ercnayî.

Qiseykerdişê Başarane ra beşêk wina yo:

''1999 ra nata vera Birêz Ocalanî tecrîd yeno caardene, bi taybetî wextê peyênî de tira xeberêke nêna girewtene. Wezîrîya Edaletî û îqtîdar hema zî na babete de bêveng ê. Tecrîdê vera Birêz Ocalanî tercîhêko polîtîk o. A raşte bingeyê pêro meseleyanê welatî de zî no tecrîd esto.

Welat de krîzo ekonomîk esto. Çaresernêkerdişê meseleya kurdan beno sebebê zêdîyayîşê nîjadperstîye, şîdetê vera cinîyan, şer, qirkerdiş û xizanîye. La îqtîdar ney de, şer û krîzan de israr keno. Komel ho bilîyê xizanîye yo la îqtîdar keno ke pê nîjadperestî payan ser o vindero.

10 rojan de zîndanan ra 7 cenazayî vejîyayî. Nînan ra yew zî cenazaya Garîbe Gezer bîye ke a zîndan de maruza tecawuz û îşkenceyî mendbî. Garîbe derheqê nê kerdişan de mektubî nuştî la hucreyê yew kesî de bi hawayêkê şikdarî dinyaya xo bedilnaye. Ma na hişmendîya Zîndanê Amedî ra şinasnenê. Ewro zîndanan de hişmendîya Esat Oktayî, îqtîdar de zî hişmendîya Kenan Evrenî esta.

Qaşo cezaya îdamî çin a la zîndanan de tepişteyê nêweşî terkê mergî benê. Embaza ma Aysele Tugluk zî nînan ra yew a. Aysele Tugluk bi serran seba cinîyan û demokrasî têkoşîn kerd. Her roje nêweşîyê aye benê giranêr. Ma reyna venga wijdanê komelî danê ke hînî zîndanan ra cenaza nêvejîya! Ma pîya vera polîtîkayanê dişmenîya kurdan û cinîyan ê îqtîdarî têkoşîn bikerê.

2021 de Peymana Îstanbulî ameye betalkerdene, qirkerdişê cinîyan polîtîkayanê îqtîdarî ra zêdîyayî. Cinîyê têkoşerî cezaya muebede gênê la camêrdê kiştoxî vera dîyenê. Roniştişê dewaya qirkerdişê Denîze Poyraz 29ê kanûne de Îzmîr de dest pêkena. Ma venga pêro cinîyan danê ke a roje bêrê Îzmîr, ma pîya kesanê ke partîya ma û cinîyan hedef kenê muhakeme bikerê, têkoşîn berz bikerê.

26ê kanûne de zî Amed de kongreya Meclîsanê Ciwanan ê HDPyî esta. Ma venga pêro ciwanan danê ke tewrê konre bibê.''