Endama Koordînasyonê KJK’yî Besê Erzîncane Stêrk TV de, programê Rojava Jin de derheqê rojdemî de qisey kerd.

Ezîncane vat: ‘’Mucadeleyê ma 40 serrî xo ya dima verdayî. Xoverdayîşêko gird vejîyayo meydan. Dinya de xeylî şorişî vejîyayî la çi heyfo ke dima ra bîyî dewlet û serdest. Heta nika qet şorişêk sey PKK’yî nêbi. Rayberîye tim perspektîf dano û ma rexne keno. Bêşik o ke şoriş bi lingêk nêeşkeno rayra şiro. Coka ganî rayîr û metodê zengîn bibê. Ganî ma goreyê demî xo bibedilnê û newe bikerê. Waştişê dewleta Tirkî qirkerdişê Kurdan o. Vera naye ganî her kes her  ca de xover bido. Ganî ma çarçeweya îdeolojîya Rayber Apoyî de xopawitişê xo bihêz bikerê. Xopawitiş heqê heme kesan o. Nê prosesî de semedê heme cimatî bitaybetî zî semedê cinîyan hewcedarîya  xopawitişî esta.’’

Ganî  Haşitîyêka Kurdan Nas Kena Bibo

Erzîncane bale atne mesajê Ocalanî ser û wina dewam kerd: ‘’Ganî hetê her kesî nê 7 nuqtayan ser o bêro muneqaşakerdene. Bitaybetî zî cinîyî ganî raşt biwanê, hol fam bikerê û raşt bica bîyarê. Şero nikayên bi aqilê camêrdan yeno domnayene û nê şerî de zirarê tewr girdî cinîyî vînenê. Komele û dezgehê cinîyan ganî nê demî hol  biercnê.  Rayberîye timûtim cinîyan rê rol  û mîsyonêko muhîm fasilna. Cinîyî rayberê cuyeyêka azade yê. Ganî haşitîyêka şar û ziwanê Kurdan nas kena bibo. Cinîyî hinî koletîye û nêheqîye qebûl nêkenê.  Vera sîstemê camêrdî û terorê dewlete her ca de xover danê. Xoverdayîşê cinîyan ê Kurdan dinya ser o têsîrêko muhîm kerd. Eke ma alternatif yew cuya awan kenê, ganî cinî û camêrdî modernîteya demokratîke esas bigerê.’’

Hukmatê Başûrî bi Keda Cinîyan Payra yo

Erzîncane xoverdayîşê cinîyan ê Başûrê Kurdistanî ard vîrî û va: ‘’ Başûr de cinîyan mucadeleyê girdî dayî. Semedê pawitişê herre û welatî xover da rolê muhîmî kay kerdî. Cinîyê ke Başûr de yê tradîsyonêkê xoverdayoxî ra yenê. Hukmatê Başûrî bi keda cinîyan payra mend. La ewro keda cinîyan nêeyseno.  Partîyê Başûrî zî bi îdeolojîya kapitalîste tê gêrenê. Seypêyîya cinî û camêrdî çîn a. Cinîyî teyna Vakur û Rojawan de rolêko bitesîr de yê. Başûr de mabênê cinîyan de rêxistinbîyayîşo hempar çîn o. Semedê naye ma xo rexne kenê.  Ma zî kemî mendî. La nika semedê mucadeleyê hemparî ma amade yê. Îşxalê Başûrî semedê cinîyan bitehluke yo. Efrîn û Şengal de ma dî çeteyî senî hêrişê cinîyan kenê. Dewleta Tirkî û Erdogan nê çeteyan weye kenê. Zîhnîyetê înan yew o. AKP dişmeno tewr pîl ê cinîyan o.  Sere de cinîyê Başûrî ganî heme cinîyî vera nê îşxalî bivejîye û herra xo bipawê. Wa her roje bi çalakîyan wayîr tarîxê xo yê xoverdayoxî bivejîyê.’’

YPJ Ruhê Xoverdayîşê Cinîyan o

Erzîncane konferansê 2’ine yê YPJ’yî pîroz kerd û qiseykerdişê xo bi nê vatişan qedîna: ‘’YPJ’yî semedê tarîxê cinîyan û merdimîye rolêko zaf muhîm û tarîxî kay kerd. Ma eşkenê vajê ke YPJ de neteweya cinîyan ame ra. Her netewe ra cinî YPJ de ca gênê. Xoverdayîşê vera DAÎŞ’î tewirêko bianor o. Hêzê YJP’yî çeteyêke her kes înan ra terseno, şîyê înan ser. Ma bawer kenê ke newe ra inşaya cimatî de ê sey hêzê pawitişê cinîyan rolê xo yê tarîxî kay kenê. Na babete de ganî xo hîna xurt bikerê.’’