Îdareyanê Herêmîyan ê Amedî yê DEM Partî wextêko kilm cuwa ver bi kombîyayîşanê şarî û rêxistinanê komelê sîvîlî komxebate kerdbî. Netîcanameyê komxebate Otêla Demîrî ya Sûrî de ame eşkerakerdene. Bi tewrbîyayîş wekîlanê DEM Partî û namzedanê şaredarî bi şîarê ''Çîyo ke yê ma yo ma pêser genê'' Beyannameyê Cinîyan ê Îdareyanê Herêmîyan ê Amedî ame eşkerakerdene.

Programî bi rêzgirewtîşî dest pê kerd. Verî Vervatoxa Meclîsê Cinîyan ê DEM Partî Halide Turkoglu qisey ekrd. Turkoglu vist vîrî ke 8 serrî yo Amed hetê kultur û xozaya ci ya tarîxî ra yeno talankerdene û vat: ''Ma zanê ke cinîyî do vera polîtîkayanê qeyûmî hesab bipersê. Heme xebatê îqtîdarê AKP-MHPyî serê dişmenîya cinîyan ê.  Heta ke partîya ma çînêbo Amed de rengê cinîyan çîn o. Ma îdareyanê herêmîyan de 25 serrî yo bi tecrubeyî têkoşînê xo yê cinîyan gave bi gave munenê, nê semedî ra xeylêk hemşaredarê ma zîndan de yê. Hemserekîye xeta ma ya mor a. Ma do xebatanê xo bidomnê û sindoqan îqtîdarê dizdî ra bipawê û qeyûman bişawê.''

Badê qiseykerdişê Turkoglu beyanname kurdkî û tirkî ame wendene. Beyanname de nê projeyî ca genê:

'' Ma do bajarê xo bi teslîmîyêtê seycîyeyî îdare bikerê. Ma do pîya bi cinîyan butçeya cinîyan bikerê û ekonomîya cinîyan hêzdar bikerê ke keda cinîyan bêro vînayene. Ma do paştî bidê berardişê herêmî û ekonomîya komunale esas bigêrê.  

Ma do vera şîdetê serê cinîyan têkoşînî xurtêr bikerê.  Her qeyde şîdetê vera cinîyan polîtîk o. Sîstemo ke her qeyde şîdetî xorî keno vera şîdetî cinîyan têna verdeno. Ma do wayîrê kultur û ziwanê xo bivejîyê û bi erjanê xo estbîyayîşê xo rê dewam bikerê.

Vera polîtîkayanê cînsî û asîmîlasyonî ma do torranê xo ke awan kerdî hêzdar bikerê.  Ma do semedê cinîyan waranê ziwan, kultur, huner û sporî zêdêr bikerê. Ma do cuya ekolojîke bipawê. Ma do xoza û waranê xo cuye bipawê. Ma do vera afatan xebatan rayra berê.

Ma do Planê Çalakîye yê Têkoşînê Vera Afatan hazir bikerê û Koordînasyonanê Cinîyan ê Vera Afatan awan bikerê. Ma do semedê wayîrvejîyayîşê macîr û multecîyan xebatan bikerê. Ma do merkezanê cuyeya azadê ronê  û semedê astengdaran îmkanan biafirnê.

Ma bi hêzê ke  tarîxê têkoşînê xo yê cinîyan û têkoşînê xo yê azadîye ra girewt û bi tecrubeyê xo yê îdareyanê herêmîyan, semedê îdareyanê herêmîyan ê demokratîkan yenê. Her DEM Jin her DEM Amed.”