Îstanbul

Zîndanê Kandira de Meclîsê Cinîyan ê HDPyî seba ke bale biancê rewşa tepişteyan ê cinîyan ser eşkerayîyêke daye. Wekîlê HDPyî Ebruye Gunay, Zuleyha Gulum û Dilşate Canbaz, Vervatoxa HDKyî Esengule Demîr zî tede xeylêk cinîyî tewrê eşkarayîye bîyî.

Esengule Demîr pare kerd ke vera cinîyan ê sîyasetmedaran polîtîkayê taybetî yenê kerdene û waşt ke Aysele Tugluk cade bêra veradayene. Ebruye Gunay vist vîrî ke Garîbe Gezer Zîndanê Kandira de amebî qetilkerdene û ard ziwan ke îdareyê zîndanî û Wezîrîya Edaletî qestî ra rayîr da qirkerdişê Garîbe.

Gunaye vat: ''Heta mesuldarê qirkerdişê Garîbe hesab bidê ma do têkoşînî rê dewam bikerê. Aysele Tugluk zî Zîndanê Kandira de ya. Ma pêro embazanê xo yê tepişteyan selam kenê. Ma do nê kerdişanê vera cinîyan qebul nêkerê. 3 mengan de 10 kesan zîndan de dinyaya xo bedilnaye. Hînî îşkence û kerdişê xirabî yê zîndanan resayî lewe. Embazê ma hê zere de, ma zî hê teber de xo ver danê. Ma ewro seba embazanê xo yê tepişteyan vengê xo berz kenê û 8ê Adare yê înan fîraz kenê.''

Amed

Komeleya Paştdayîşê bi Hukmwerdeyan û Tepişteyan (TUHAY-DER) derheqê binpaykerdişanê heqanê tepişteyan de semtê Tesîslerî yê Amedî de eşkerayîya çapemenîye daye. Îdarekaranê HDP, DBP, MED-DER, MEBYA-DER, aktîvîstanê TJA û endamanê TUHAY-DERî paştî daye eşkerayîye.

Hemsereka TUHAY-DERî Gulere Yuksekbag eşkerayîye wende. Yuksekbage da zanayene ke ê do têkoşînê Garîba Gezer rê dewam bikerê. Karabage îfade kerd ke zîndanan de tecrîd dewam keno û vat: ''Ganî tecrîdê vera Birêz Ocalan bêro qedînayene û pêvînayîşê bi avûkatan bêro kerdene.  Zîndanan de heqê tepişteyan bi hawayêkê sîstematîkî yenê binpaykerdene. Ma vera nê kerdişan têkoşînê xo rê dewam bikerê. Ma do 8ê Adare de bibê vengê cinîyan ê tepişteyan.''

Mersîn de verê Zîndanê Tarsusî de rayberîya TJA û TUAYDERî de eşkerayîye ameye dayene. Wekîla HDPyî Pêroye Dundar û Mayê Haştîye zî tewrê eşkerayîye bîyî. Eşkerayîye de ame waştene ke pêro tepişteyî wa ver bidîyê û tecrîdê Îmraliyî bêro wedaritene.