Meclîsê Cinîyan ê HDPyî kombîyayîşêk kerd. Kombîyayîş de bi giranî dewaya qefilnayîşî ya vera HDPyî, vera nayî xarîtaya rayîrî, rojdeme cinîyan ameyî destgirewtene.

Hemsereka Pêroyî ya HDPyî Pervîne Buldan û xeylê cinîyî tewrê kombîyayîşî bîyî. Buldana ke verê kombîyayîşî eşkerayîye daye cinîyê tepişteyî selam kerdî û vat ê do sibayanê azadan de bêrê têhet.

Buldane bale ante nê nûqtayan ser:

''Rixmê heme zextanê îqtîdarî cinîyî 8ê Adare de vejîyayî kuçeyan. Nê cinîyî bi eynî moral û hêzî Newroze de reyna warî kerdî pirr. Rejîmê yew merdimî ke her ca de vera cinîyan dest pê şerî kerdo cewabo tewr rind Neweroze de girewt. Newroza emserî Newroza cinîyan bî. Cinîyan waranê Newroze de vera hukmatî serewedarit û vat ''ti nêeşkenî mi bitersnê'', ''ti nêeşkenê mi biqefilnê'', ''ti nêeşkenê destkewteyê mi bi derbeya yew camêrdî nêmeya şewe de betal bikerê''. Cinîyan îqtîdarî ra vat ''ti zordarî la ma nêtersenê.'

Hesabê tewr pîl pandemî şarî rê da dayene û înan zî firsendê pandemî şuxulnayî.  Şar kerd feqîr û salatanatê xo domna. Ma nînan xo vîr a nêkenê û do hesabê ci bipersê. Îqtîdarê AKPyî merkezê hesilîyayîşî yo. Ma cinîyî nê helisîyayîşî hol vînenê. Coka ma destûrê înan nêdanê, ma do mede zî. Ma do peynîya nê helisîyayîşê înan bîyarê. Xora ê zî hêzê ma zanê coka tersenê. Coka Pêkerdişê Îstanbulî ke destkewteyê cinîyan o û heme heqanê cinîyan paweno rê  bi îmzayêk darbe kerde. Betalkerdişê nê pêkerdişî şîdetê vera cinîyan û domanan akeno. Ma nayî qebul nêkenê ma do heme madeyanê nê pekerdişî bîyarê caardene.

HDP mucadeleyê sîyasetî yê cinîyan o. HDP partîya cinîyan a ke ê her hetî ra xo tede îfade kenê. Bi qefilnayîşê HDPyî wazenê ke destkewteyanê cinîyan rê darbe bikerê. Xora hetêkî ra cinîyî yenê hepskerdene û hetê bînî ra wezîfeyê înan yenê xespkerdene. Nika zî bi qefilnayîşê HDPyî wazenê darbeya xo temam bikerê. Hêvîya înan sîyaseto bê HDP û vîjnayîşo bê HDPyî yo. Ma destûr nêdanê. Ê do çirey meeşkê HDPyî biqefilnê. Xoverdayîşê ma û şarê ma do dewam bikero.

Mayê Şemeyî 26 serrî yo aqibetê merdimanê xo persenê, peyê heqîqetî de yê û edalet wazenê. Mayî aqilê faşîstî ra hesab persenê. Êyê ke ganî hesab bidê nika kenê ke Mayanê Şemeyî ra hesab bipersê. Şima nêeşkenê Mayanê Şemeyî muhakeme bikerê. Mayî Şemeyî şima muhakeme kenê.

Reyna Emîne Şenyaşara ke keyeyê ci ame qedilkerdene 20 rojî yo semedê caardişê edaletî veng dana. Îqtîdaro faşîst herinda hesabdayîşî de maye Emîne destbend keno. Senî ke Mayanê Haştîye û Mayanê Şemeyî rê kenê aye rê zî wina kenê. Vera zûranê xo vengê heqîqetî û vera zulmê ve vengê edaletî nêwazenê. Ma tîya ra soz danê ke ma do hesabê nê hemeyan bipersê.

No îqtîdar şerê estbîyayîş û çînbîyayîşê xo rayra beno.  Vera nê şerê înan xoverdayîşê cinîyan esto. Ma cinîyî do çirey destûr nêdê ke zîhnîyeto faşîst nê welat û ameyoxê ma serûbin bikero. Ê hesab kenê ke bi HDPyî mucadeleyê cinîyan biqefilnê la  ma do bi HDPyî qanûnê bingeyî yê demokratîkî yê cinşyan ronê, îdareyê demokratîkî yê cinîyan ronê. Ma do wisarê cinîyan bidê ciwîyayene. Ma do nê îqtîdarê camêrdê faşîstî miheqeq bibedilnê.