Partîya Şaran a Demokratîke (HDP) ke weçînitişanê cayîyan ê 31’ê Adare de îdareyê zafaneyê şaredarîyanê Kurdistanî newe ra girewtî, xebatanê xo yê seba sererastkerdişê tehrîbatanê qeyûman domnenê. Şaredarîya Sûrî ke xoverdayîşê xoîdarekerdişî tede estbi, şaredarîyanê ewilênan ra yewe bîye ke bi rayîrê qeyûmî amî destsernayene. Hemşaredara Sûrî Fîlîz Bûlûttekîne ard ziwan ke qeyûmî şaredarîye bi her hawayî talan kerda, şaredarî fînaya binê deynan û polîtîkayêka winayêne rayra berda ke şaredarî û şar bêrê hemverê yewbînan, la nêeşkayo na polîtîkaya xo de bi ser bikewo.

 Bûlûtekîne bale ante serê hale keyeyanê ke Sûr de keyeyê înan xira bîyê û vat, “Merdimî wazenê mehleyanê ke tede ameyê dinya û bîyê pîl de biciwîyê, labelê nê mehlayî hendî çinê. Ma kenê ken a babete de çareserî peyda bikerê.” Bûlûttekîne vat ke çareserîya nay ewe zî paştdayîşo cimatkî û destekê rayapêroyîye yo. Bûlûttekîne ard ziwan ke ê do plansazîya xo ya seba panc serran bifînê pratîkî, heman wextî de cinîyan û beşanê bînan ê cimatî dir kombîyayîşan virazê, waştişanê înan goşdarî bikerê û na çarçewa de gaman bierzê.

Bûlûttekîne bale ante serê muhîmîya tewrbîyayîşê şarî yê îdareyê cayîyî û vat, “mîyanê şarî de ganî mekanîzmayê qerarî bêrê afernayene. Xora qerarê ma o yo ke bi fehmê şaredarîya azadîperwere ya cinî û cayîye tê bigêrê. Ma qalê şaredarîyêka winayêne kenê ke her kes, her beşê cimatî ra tede ca bigêro. Amacê ma yo bingeyên o yo ke no fehm vila bibo. Şaredarîyêk ke şar xo tede nêvîno hemverê peymeyanê ma de ya. Loma seba ma çîyo muhîm qerarê heme beşanê cimatî yo.”