Cinîya sêwazije ya femîniste Tuba Can mehlimîye caverda û pê bîsîklete dest pê gêrayîşê dinya kerd.

Tuba Can wina qala hîkayeya xo kena: ''Mi hîrê serrî û nîme verî mehlîmîya matematîkî ra îstîfa kerd. Seba ke mi zanayênê keyeyê mi nê qerarî qebul nêkeno mi biney înan ra nimit. Dima ra ez Îstanbulî ra pê bîsîklete kewta rayîr. Heta Îskenderun ez 5 mengî rayîran de bîya. Badê nê 5 mengan mi ferq kerd ke mi senî qerarêko rind girewto. Seba ke zimistan bi nizdî mi verê xo da Brezîlya û uca ra heta Uruguay, Arjantin, û Şili mi bîsîkletê ramite. Ez serrêke û nîme uca menda. Nê demî de ez karana wirdîyan de xebityaya û mi xerclixê xo vet. Dima janê Korona vejîya û ez agêraya. Tirkîya de verî mi Sêwazî ra heta Anqara da pedalan ro. Dima ra mi zimistan Fethîde ravêrna. Menga nîsane de dima ke hewayî bîyî germin ez kewta rayîr. Badê Denizlî, Afyon û Bolu ez ameya Dêrsim.''

Cane derheqê Kurdîstanî de wina qisey kena: ''Gama ke ez Amerîkaya Başûre de bîya mi qerarê ameyîşê Kurdîstanî girewt. Uca embazê ke mi nas kerdî mi ra zaf Kurdîstanî persayêne. Mi ra vatêne ti kurdkî zana? Kurdîstan de rewşe senîna? Seba ke ez nê persan nêeşkeya cewab bikerî ez zaf şarmîyaya û qehrîyaya. Ez her ca de yew hewte vindena la di mengî yo Ez Dêrsim de ya. Ez qet cayêk de wina derg nêmenda. Mi tîya zaf embazê rindî nas kerdî. Tirkîya de şar gêrayîşê mi rê eceb mendêne la Kurdîstan de wina nîyo. Tîya normal vînenê û paştî danê mi. Beno ke semedê nayî ez tîya zaf menda. Ez tîya ra do ver bi bajaranê bînan ê Kurdîstanî bikewe rayîr. Goreyê planê mi ez zimistan emser Kurdîstan de ravêrnena. Kurdîstan pîya bi merdim, tarîx û cografyaya xo cayêko biheybet o. Na herre û merdimanê ci mi ser o zaf tesîr kerd, ez nêeşkena caverdî.''

Cane qiseykerdişê xo wina qedîna: ''Ez her ca de wazena cinîyan û domanan dir tekîlî ronê. Çi heyf ke vera cinîyan neheqîye esta. Ez wazenê bimojnê cinîyan û domanan ke yewna cuya munkun o. Bitaybetî ez wazena ke kênayî gama ke benê pîl wa qeraranê xo bi xo bîgirê. Eke yew tengayî biance wa vejê tîya ra cinîyêke ravêrte, a nêtersaye. Cinîyan tersnenê. Ez wazenê vera tersî wa çîyê ke pê cesaretî ma kenê şayî wa bibê.''