Nawnayîşê 8ê Adare Roja Cinîyan ê Kedkaran a Dinya Meydanê Îstasyonî yê Amedî de rayberîya Platformê Cinîyan ê Dîcle-Amedî (DAKP) de pê sloganê 'Ma vera qirkerdişê cinîyan, cuye pawenê; vera tecrîdî azadîye pawenê' dest pêkerd.

Endamê DAKP, TJA û Meclîsê Cinîyan ê HDPyî, Komeleya Cinîyan a Rosa, Akdemîya Cinîyan û xeylêk rêxistinî tewrê nawnayîşî bîyî.

Wekîlê HDPyî Remziye Tosûn, Semra Guzel, Dersîme Dag û endamê Konfederasyonê Sendîkayanê Karkeran ê Şoreşgêran (DÎSK), Yewîya Odayanê  Mîmar û Muhendîsan a Tirkan (TMMOB), Komeleya Huqûqnasan a seba Azadîye (OHD) û Partiya Karkeran a Tirkîya tewrê çalakîye bîyî.

Meydanê Îstasyonî pê renganê kesk-sûr-zerdan û pankartan xemilîya

Nameyê Komîteya Amadekare ser o Songule Kapanci qisey kerd û vat: ''Ma tîya de rayîrê azadîye ser o şinê. Ma vera şer û koledarîye cuye û azadîye pawenê.''

Dima mesajê Rayraşîyayîşê Cinîyan ê Dinya ame wendene. Mesaj de wina ame vatene: ''Têkoşînê ma têkoşînêko enternasyonalîst o. Ma pîya şinê û hîkayeya xo newe ra nusenê.''

Salîha Aydenîz cinîyê tepişteyî selam kerdî û vat: ''Ma do her ca de têkoşînê xo dewam bikerê. Cinîyî do dinya bivurnê. Ma do kurdan îqtîdarê dişmenî ra bixelisnê. Têkoşînê cinîyan do peynîya înan bîyaro. Cinîyî vera tecrîdê Îmraliyî benê çeper. Ma grevê vêşanîye rê zî selam kenê. Heta tecrîd nêqedo ma waştişanê xo ra fek vera nêdê.''