Kongreya Awankerdişî ya Meclîsê Cinîyan ê Vakur û Rojakewtena Sûrîye bi slogana ‘Yewîya Cinîya Azade Temînatê Sûrîyeya Demokratîke yo’ bi tewrbîyayîşê heme têhetameyîşanê cinîyan, Hola Beylesanî ya qezaya Amûdê de ameye viraştene.

Dimayê munaqeşeyanê serê raporê Komîteya Amadekarî ya Meclîs Cinîyan ê Vakur û Rojakewtena Sûrîye, rêznameyê meclîsî hetê andama Komîteya Amadekarîye Sîham Emoka ra ameye wendene. Goreyê nîyadayîş û pêşnîyazan tayê beşî ameyî bedilnayene.

Têgêrayîşê Goran û Yewîya Cinîyan ê Kurdistanî xelate pêkêşê Kongreya Starî ya viraşta kerde. Hetê bînî ra Kongreya Starî heyetê ke Başûrê Kurdsitanî ra ameyê (Partîya Azadîye, Têgêrayîşê Goranî, Rêxistina Zerdeştî ya Kurdistanî, Partîya Torî Haboşî, Tevgera REPAK’î û çalakgera Şirîn Dorî ) xelatî dayî ci.

Seba weçînayîşî koordînasyonê meclîsî raydayîş ame kerdene. Netîceyê weçînayîşî de Jorjet Yaqûbe, Ebîr Hesafe, Lemîya Xelo, Xewla El-Îsa, Zozan Mustefa, Stêra Qamsime, Necla Temo, Duha El-Fîteyîhe, Nalîn Reşo, Asya Abdullahe, Jiyan Hisêne, Sîham Emoka, Mizgîn Zêdane, Narîn Metînî, Buseyna Gêlo, Bêrîvan Hisêne û teba Nusra El-Ebaka ra 17 kesî seba meclîsî ameyî weçînayene.

Peynîya kongre de peyname hetê endama Komîteya Amadekarî ya Kongre Stêra Qasime ra ame wendene.

Peyname de ame vatene ke no meclîs do rolêko gird prosesê bedilîyayîşê demokratîkî yê cimatî de kay bikero. Beşdarbîyayoxan bale ante ser ke no meclîs do bibo merkezê hemparê heme cînîyan ê Vakur û Rojakewtena Sûrîye yo ke tede dewayanê xo munaqeşe bikerê û rayîranê çareserîyan ê hemparan bivînê.