Qezaya Baglarî de Weçînitişanê Cayîyan ê 2019’î de Partîya Şaran a Demokratîke (HDP) şaredarîye bi nisbetê se ra 70,34’î qezenc kerde. Bi QHQ’yî îxracbîyayîşê hemserekê HDP’yî yê bajarî Zeyyat Ceylanî sey mazeret ame ramotene û mazbata dîyaye bi serekê şaredarîye yê AKP’yijî ke bîye partîye dîyine. Huseyîn Beyoglûyo AKP’yijo ke dimayê girewtişê mazbata ra dest bi gureyî kerd, seba ke xizmetêk nêkeno rastê reaksîyonê şarî yeno. Cinîyê ke mehlayanê Mûradîye û Fatîhî de ciwîyenê vat ke çopê înan nênê arêdayene û na yewe ra domanê înan boya leymine ra nêweş kewenê.

‘Wesayîtê Dermanî Nêşirawenê Mehla’

Bedrîye Yildize ya ke ronişteyanê mehla ra ya vat wextê Partîya Herêmanê Demokratîkan (DBP) de mehlayê înan bi hawayêkê binîzamî ameyêne pakkerdene la nika pakîye nêna kerdene. Bedrîye vat: “Ma kenê ke kuçeyanê xo bi xo pak bikerê, labelê no qîm nêkeno. Xusûsen zî menganê hamnanî de seba ke çopî boy danê domanî rîyê nê ra nêweş kewenê. Mêsî kewenê çopan û bi wesayîtê dermanî mêsî mehla ra nênê pakkerdene.”

 Kudret Aydemîre zî vat seba ke çopî hîna zaf boye medê her roje verê berê xo şuwena û seba ke bi poşetan serê înan gêna.

 ‘Çopî Hewte ra Rojêk Yenê Arêdayene’

Mesûde Gezena ke 16 serrî yo mehla de ya vat gama ke şaredarîye destê DBP’yî de bîye kuçeyî her roje ameyêne pakkerdene, labelê nika rîyê leyminîya mehla ra pîya bi embiryananê xo nêeşkenê teber de ronişê. Mesûde vat, “Gureyo ke ganî şaredarî bikero ma kenê. Baglar de tena kuçeyê hîrayî yenê pakkerdene. Kuçeyanê mabênan de çopî hewte ra reyêk yenê arêdayene. Rîyê boye û mêsan ra domanê ma nêweşîyan dir yenê têrî. Ma biqesawet ê.”