Perey şewe pê fermanê Serekkomarê Tirkîya Recep Tayyîp Erdoganî Tirkîya Peymana Îstanbulî ra xo apey girewte û peymane fesh kerde.

Vizêr bi hezaran cinîyî Kadikoy de verê Îskeleyê Meydanî de ameyî pêser û rewşe protesto kerd. Cinîyan verî verê Operaya Sureyya de eşkerayîye daye dima zî ver bi Parka Mehmet Ayvalitaşî şîyî.

Rixmê astengîya polîsan zî cinîyan dest bi destî zîncîrêk viraşt. Cinîyan çalakîye de dowîz û pankartê sey 'Cinîye, cuye, azadîye', 'Serewedaritiş' 'Madeya 6284î bîyarê ca', 'Kişîyayîşê cinîyan polîtîk o' akerdî û sloganê winasênî vatî.

Cinîyan eşkerayîya xo de ard ziwan ke îqtîdar dişmenê cinîyan û destkewteyanê cinîyan o û pê wedaritişê Peymana Îstanbulî vano ke 'cinî û camêrdî têdûşt nîyê' Eşkerayîye wina dewam kena: ''Dewlete faîla cinîyanê ke kişîyayê, maruzê şîdetî bîyê. Peymana Îstanbulî netîceya têkoşînê bi serran a cinîyan a. Ma na bira wedaritişî qebul nêkenê. Heta ke Peymana Îstanbulî bêra caardene têkoşînê ma do dewam bikero. Ver dewleta dişmenê cinîyan wa biciwîyo paştdayîşê cinîyan.''

Platformê 'Ma do kişîyayîşê cinîyan vindarnê' (KCDP) zî bi heman armancî Îskele de eşkerayîye daye.

Platformê Cinîyan ê Dêrsimî zî şaristan de pê eşkerayîyêke wedaritişê Peymana Îstanbulî protesto kerd.

Eşkerayîye de sloganî ameyî vatene, pankartî ameyî akerdene. Nameyê platformî ser o Çagla Yolaşan eşkerayîye wende û ard ziwan ke ê na bire qebul nêkenê û heta peyêne do Peymana Îstanbulî bipawê.