Emîne Şenyaşar semedê mêrde û di domanê ci yê ke ameyî qetilkerdene û lajê ci yo ke rehîn yeno tepiştene xoverdayîşê xo 19 rojî yo domnena. Cinîyan ê Şirnexî Emîne Şenyaşar zîyaret kerd û paştî daye ci.
Emîne Şenyaşara ke mêrde û di lajê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de 19 rojî yo çalakîya 'nobeta edaletî' rê dewam kena.
Înîsîyatîfê Mayanê Haştîye yê Şirnexî, atkvîstanê TJA û endamanê Meclîsê Cinîyan ê HDPyî yê Şirnexî ra grûbêka cinîyan keyeyê Şenyaşarî zîyaret kerd.
Seba ke peynîya hewteyî de banê edlîye qefilnaye yo pêvînayîş nêzdîye cayê çalakîye de ame kerdene. Hemsereka HDPyî ya Cizîre Guler Tunçî ard ziwan ê bi nameyê cinîyan ê Şirnexî nê zîyaretî kenê.
Tunç vat: ''Dayîkê ke sey to domanê xo vînî kerdî mîyanê ma de estê. Ma zî vera bêadeletîye cigêrayîşê edaletî de yê. Ma do heta caardişê edaletî paştî bido ti. Ma dejê to zaf hol fehm kenê û pare kenê. Waştişê to yê edaletî waştişê ma yo.''
Emîne Şenyaşar zî nê vat: ''Ma rê têna zulm kenê. Mi bê zulmî qet çîyêk nêdî.19 rojî yo ez tîya nişena ro û heta ke qeydê qirkerdişê nêweşxaneyî vejîyê werte ez do çalakîya xo rê dewma bikerê. Qey qeydan eşkera nêkenê? Mi tepişî zî bimirnê zî ez do waştişê edaletî cameverdî. Lajê mi bîlasebeb tepişteyo. Eke o sûcdar o wa bêrê ma hemeyan tepişê''
Cinîyê ke merkez û qezayanê Cizîre, Silopî, Hezex û Êlke yê Şirnexî ra ameyî Emîne Şenyaşarî dir qisey kerd.
