Serkêşîya Têgêrayîşê Cinîyan ê Azadan (TJA) de semtê Ofîsî yê qezaya Yenîşehîrî yê Amedî de vera qetilkerdişê Endama Merkezê Cigêrayîşî yê Jineolojî û Edîtora Jineolojî Nagîhane Akarsel eşkerayîye daye.

Vervatoxa Meclîsê Cinîyan ê HDPyî Ayşe Acar Başaran û Vervatoxa Ciwanan ê HDPyî Dêrsime Dag gêrîyayî binê ablûqaya polîsan. Wextê ablûqa de cinîyan sloganê 'jin, jiyan, azadî' vat. Eşkerayîye de fotografê Akarsele akerdî.

Wexto ke Başarane qisey kerdêne polîsan waşt çapemenîye asteng bikerê. Başarane vat: ''Polîsî nêverdenê ke cinîyî qetilkerdişê cinîyan protesto bikerê. Ma zanenê ke Akarsele hetê kam kesan ra kişîyaya. Kesê ke nêverdenê ma eşkerayîye bidê, hemkarîya nê hêzanê kiştoxan ê. Ma nê qetilkerdişî şermezar kenê û reyna vanê ke qet yew qetilkerdiş nêeşko bikero ke ma apey gamêke bierzê. Ma do bi azadîya cinîyan nê îqtîdaranê faşîstan ra bixelisê.''

Cinîyan dima sloganê 'jin, jiyan, azadî' û 'çapemenîya azade nêna bêvengkerdene' vatî. O çax amîrêkê polîsan vat 'Embazêne ma do yew bi yew vejîyê ney?' Cinîyan yew fekî ra vat 'nê.' Dima cinîyî bi sloganan, tîlîlî û çepikan ablûqa ra vejîyayî.