Festîvala Cinîyan a Rojbîne (Fîdan Dogane) ya 3’ine ya ke hetê Têgêrayîşê Cinîyan ê Kurdan ê Fransa  (TJK-F) ra ameye organîzekerdene Parîs de bi tewrbîyayîşê cinîyan ê Kurdan û Fransizan bicoş ameye viraştene.

Festîvala ke bi şîarê  ‘’Xoverdayîşê Cinî rayîrê azadîye akeno’’ bi rêzgirewtişî û qiseykerdişê vervatoxanê TJK-F’yî ra Şengul Karaca dest pêkerd.

Koordînasyonê KJK’yî zî bi mesajêk festîvale silam kerde û nê vatî: ‘’Bi na festîvale cinîyî vera sîtemî bi hawayêkê cimatkî û kulturkîyî îradeyê cinîyan ramojnenê û her serre hîna bihêz benê. Ma umîd kenê ke cepheyê cinîya demokratîke bi gureyanê winayênan rêxistinbîyayîşê xo gird keno û rolê xo yê tarîxîyî kay keno. Xora aktîvîteyê winayênî rengan û venganê cîyayan anê têhet û înşayê sîtemê konfederalîzmê demokratîkî rê xizmet kenê.’’

Hemkoordînatora Partîya Çepe Danîelle Sîmonneta ke festîvale de qisey kerd, bale ante xoverdayîşê cinîyan ê Kurdan ser û paştdayîşê bi Cinîyan ê Kurdan û Festîvala Rojbîne ard ziwan.

Festîvale de ekîbê govende, Meral Alkane, Denîz Demane, Xecê Yaşare, Rûken Newa, Dîlana Rojarya û Pinar Aydinlare vejîyayî sehne. Domanan zî di parkanê cîya-cîyayan de û atolyeyan de wexto rind ravêrna. Standanê kitaban ê FEDA û Heyva Sor’î ya pîya semedê paştdayîşê cinîyan ê citkaran ê Rojawanî yê ke dewleta Tirkî hêgayê înan vêşnayî, standêkê vilikan ame akerdene.