Yewîya Cinîyan ê Sûryanîyan a ke 2013 de ameya awankerdene, bi paştdayîşê cinîyan ê ereb, kurd û sûryanîyan wazena Rojhelatê Mîyanênî de rêxistinîya cinîyan û komelî hîra bikera. Endama Yewîya Cinîyan ê Sûryanîyan Corcete Bersemo derheqê babete de ANFyî rê qisey kerd.

Corcete ard ziwan ke Şorişê Rojawanî ra dima heqê cinîyan ê sûryanîyan çin bîyê û şorişî ra dima bi beşdarîya 200 cinîyan înan xo binê na sîwane de rêxistin kerdo. Corcete vat: ''Bi îlankerdişê Yewîya Cinîyan ê Sûryanîyan ma cade dest pê xebatanê rêxistinîye û perwerde kerd. 2019 de Qamişlo de ma Keyeyê Cinîyan ê Sûryanîyan awan kerd. Tîya de meseleyê şarê ma û cinîyan yenê çareserkerdene.

2018 de Hesekê de Akademîya Cinîyan ê Ciwanan ê Bese Nahren ameye awankerdene. Tîya de zî karê perwerdeyî yenê dayene. Xora ma wazenê hîna zaf girîngîye bidê perwerdeyê îdeolojîkî ser.

Armancê Yewîya Cinîyan ê Sûryanîyan rêxistinkerdişê cinîyan ê sûryanîyan, averberdişê dîyaloganê bi cinîyan ê bînan o. Ma kenê ke mabênê cinîyan ê kurdan û ereban de têkilîya xo aver berê, pîya rêxistinîyêka xurte awan bikerê. Ma tewrê konferansê cinîyan ê Lubnanî bîyî. Bi paştdayîşê cinîyan ê ereb, kurd û sûryanîyan ma wazenê Rojhelatê Mîyanênî de rêxistinîya cinîyan û komelî hîra bikerê.''