KadikoyêÎstanbulî de cinîyî çalakîya 8ê Adare de ameyî têhet. Cinîyê ke bi kincanê reng bi rengan, çapik û tîlîlîyan warê çalakîyê kerd pirr bi slogananê xoverdayîşî qîrayî.

Verê çalakîyê polîsan warê çalakîye girewt binê ablûqa. Rixmê hêrişê polîsan cinîyan pê sloganan rayraşîyayîşê xo rê dewam kerd. Cinîyê HDK û HDPyî zî pê slogananê ''Cinî cuye azadîye'' û ''Cinîyî do hînî hiş nêkerê'' ver bi warê çalakîye rayra şîyî.

Bi nameyê Platformê Cinîyan eşkerayîye kurdkî, tirkî û erebkî ameye wendene. Eşkerayî de bale ameye antene polîtîkaya hêrişkare ya hukmatî ya vera cinîyan ser û ame vatene ke cinîyî rixmê heme hêrişan wayîrê heqanê xo vejîyenê û verê zextan de çok nêdanê. Cinîyan ard ziwan ke ê do Pêkerdişê Îstanbulî cameverdî û bi xoverdayîş û rêxistinbîyayîşî do azadîya xo qezenc bikerê. Eşkerayîye cigêrayîşo rût û hêrişê vera bawerî, nasnameyê bînan û LGBTİ+yan zî ardîya vîrî û ame vatene ke cinîyî ne vera hêrişê DAÎŞî ne zî vera  hêrişê ke dewlete pê eynî metodan kena de çok nêda û do çirey verê hêrişê dewlet-camêrdî de milê xo çewt nêkerê. Cinîyan semedê wayîr vejîyayîşê tepişteyan  veng da û vat seba ke ê bibê vengê tepişteyanê ke 100 rojî yo grevê vêşanîye de yê ganî mucadeleyî pîl bikerê.