Bi vengdayîşê Platformê Cinîyan ê 8ê Adare  Meydanê Îskelê yê Kadikoyê Îstanbulî de têhetameyîşo bîl ê cinîyan ame organîzekerdene.

Têhetameyîşo ke sey mîtîngî ravêrt bi hezaran cinîyî tewrê ci bîyî. Aktîvîstê TJA û endamê HDP û HDPyî yê  ke verê têhetameyîşî verê banê HDPyî yê Kadikoyî de ameyî têhet rixmê astengkerdişê polîsan heta meydanî rayra şîyî. Rayraşîyayîşo ke bi tewrbîyayîşê wekîlanê HDPyî û Hemsereka HDPyî ya Îstanbulî Îlknure Birol ame kerdene fotografê Garîbe Gezer, Aysele Tugluk û Denîze Poyraz ameyî kiriştene. Cinîyan pê kuwayîşê erbenayan û slogananê ''Cinî cuye azadîye'2 û ''biciwîyo xoverdayîşê cinîyan'' qîrayî. Cinîyan pê kincanê xo yê neteweyan kuçeyî xemilnayî. Çalakîye de govende ameye girewtene, azadîya tepişteyanê nêweşan ameye waştene. Cinîyan dismal û beyraqe sipîyî têşayî û vat ''Aysele Tugluk têna nîya'', ''Gulîstane Doku ha ça?''

Dima ra eşkerayîye ameye dayene. Cinîyan vat ê vera heme zext û hêrişan sere wedarenê û seba ke wayîrê azadîye, cuya û heqanê xo vejîyê do tim kuçeyan de bê. Cinîyan vist vîrî ke bi serran o heqê înan yenê binpaykerdene û ê yenê qetilkerdene û vat serra 2022 de camêrdan tewr tay 64 cinîyî qetil kerdî ke qirkerdişê cinîyan polîtîk o. Eşkerayîye de ame vatene ke hetêkî ra tepişteyê edlîyî vera dayî û verê qirkerdişê cinîyan akerd hetê bînî ra tepişteyanê sîyasîyan zîndan de mergî rê caverdenê. Cinîyan ard ziwan ke dewlete pê metodanê zorî hêrşê cinîyan kena têkoşînê cinîyan ê xelisnayîşî bifatisno û vat hêrişî do meeşkê verê înan bigêrê. Cinîyan vat ma tîya de yê çunke ma do ameyoxê azadî rone. Hêzê ma esto ke ma bibedilnê.‘‘