Xeylêk şaristanan de cinîyan bi sloganê 'Cinîye, cuye, azadîye' paştî daye xoverdayîşê cinîyanê Îran û Rojhelatê Kurdîstanî.

Şaristanê Lozanî de dezgehanê cinîyan, partîyanê sîyasî û rêxistinanê komelê sivîlî şexsê Jîna Emînî de qirkerdişê vera cinîyan şermezar kerd. Cinîyan pîya sloganê 'Cinîye, Cuye, Azadîye vat û fotografê Jîna berz kerdî.

Paytextê Arjantînî Buenos Aires de vengdayîşê 32 dezgehan û kesayetan ser  o çalakîyêke ameye kerdene. Çalakîye verê Sersefîrîya Îranî de ame kerdene û cinîyan tîya de Îran şermezar kerd.  Qiseykerdişan de ame vatene ke ganî cinîyî dormeyê sîstemê 'Cinîye, Cuye, Azadîye' de rêxistinîya xo awan bikerê.

Paytextê Fînlandîya Helsinki de serkêşîya PJAK û KJAR û Merkezê Komelê Demokratîkî yê Kurdan de qirkerdişê vera cinîyan ame protestokerdene. Çalakîye de bi sloganan paştî dîyaye xoverdayîşê cinîyanê Îran û Rojhelatê Kurdîstanî.

Kurdîstanijan Kampa Lavrioyî ya Atina ya Yunanîstanî de grûbanê anarşîstan reyde ver bi Sersefîrîya Îranî çalakîya rayraşîyayîşî kerde û Îran şermezar kerd.

Şaristanê Liege yê Belçîka de cinîyê kurd, fars û belçîlayîjî verê Meclîsê Cinîyan ê Şehîd Ronahî de ameyî pêser. Înan sloganê 'cinîye, cuye, azadîye' vat û çalakîya înan zaf eleqe dîye.