Endama Merkezê Cigêrayîşî yê Jîneolojî û Edîtora kovara Jîneolojî Nagîhane Akersel Silêmanî de ameyî qetilkerdene. Cinîyî semedê protestoyî bajaranê Kurdîstan û Tirkîya de vejîyayî waran.

Amed de hetê Têgêrayîşê Cinîyan ê Azadan (TJA) û Meclîsê Cinîyan HDPyî  ra semedê Endama Merkezê Cigêrayîşî yê Jîneolojî û Edîtora kovara Jîneolojî Nagîhane Akersel ya ke Silêmanî de ameyî qetilkerdene Parka Hazalî de eşkerayîye ameye dayene. Eşkerayîye de edîtoranê Kovara Jîneolojî ra avûkate Rûşene Şeydaoglu qisey kerd.

Şeydaoglu vat: ‘’Nagîhane pê hemakarîya camêrdan ameye qetilkerdene. Ma zanê ke sîstemê camêrd-serdestî tim falîyetanê plankerdeyan keno. No hêrişo xayîn vera cinîyan, azadîye û kulturê cinîyan o. Cinîyê kurdan do çirey nê qebul mekerê. No hêriş têna vera cinîyan ê kurdan nîyo, vera cinîyan ê dinya yo. Îran de kuçeyî pê slogana Jin jiyan azadî benê roşn. Ma do tim vera xeta xayîne ya sîstemê camêrdî têkoşîn bikerê.’’

Badê eşkerayîye polîsan cinîyî girewtî binê ablûqa û muxabîra Ajansê Xeberan ê Mezopotamya Eleme Akdag û vilakerdoxê Rojnameyê Yenî Yaşamî Azad Taşkin destbend kerdî.

Dêrsim de zî serkêşîya TJA de qetilkerdişê Nagîhane Akarsel ame protestokerdene. Çalakîye de Hemsereka HDPyî ya Dêrsimî Nazli Çelîk Oz qisey kerd. Oze vat ê soz danê ke do rayîro ke hemraya înan Nagîhane serkêşîya ci kena de bi hewayêkê qerardarî rayra şirê.

Reyna Agirî, Mêrdîn, Tetwan, Anqara, Manîsa û xeylêk bajaranê bînan ê Kurdîstan û Tirkîya de zî cinîyî semedê Nagîhane Akarselî vejîyayî waran û polîtîkayê qirkerdişî yê vera cinîyan şermezar kerdî û vat ê do têkoşînê Nagîhane Akarsel bidê domnayene.