Cinîyî Wan de do vejîyê meydanan

Îdarekara Komeleya Cinîyan a Starî ya Wanî Rojbîne Bor da zanayene ke Wan de 2 menge de 7 cinîyî kişîyayî û vat: ''Vera naye ma do 8ê Adare de meydanan de bibê.''

Îdarekara Komeleya Cinîyan a Starî ya Wanî Rojbîne Bor derheqê amadekarîya 8ê Adare Roja Cinîyan ê Kedkaran a Dinya de ANFyî rê qisey kerd.

Bore verî eşkera kerd ke 2020 de 300 cinîyî kişîyayî û 2 menganê peyênan de 7 cinîyî bi hawayêkê şikdarî merdî. Bore vat: ''Qirkerdişê cinîyan polîtîk o. Welat bîyo goristanê cinîyan. Camêrdî wexto ke qirkerdiş plan kenê vanê 'Ez yew di mengan zîndan de manena dima vejîyena.' No Kurdîstan de polîtîkaya şerê taybetî ya. Serebûtê Musa Orhanî zî wina yo ke vatbi 'mi rê çîyêk nêbeno.' ''

Bore îfade kerd ke ê pê mîrasê tradîsyonê xoverdayîşî vera şîdet û qirkerdişê cinîyan têkoşîn kenê û vat: ''Ma rê ercîyayo ke ma bêrê pêser, pîya çîyêk bikerê û pîya têbigêrê. La dewlete û hêzê ci ma asteng kenê. Qeyûmî komeleyê cinîyan qefilnayî. Cinîyan rê şîdeto fîzîkî û mental yeno kerdene. Komeleya ma vera na rewşe têkoşîn kena.''

Bore pare kerd ke emser ê do binê pêro şert û mercanê janî û astengîyan de zî Têgêrayîşê Cinîyan ê Azadan (TJA) û Meclîsê Cinîyan ê HDPyî reyde 8ê Adare fîraz bikerê. Bore vat: ''Ma do 8ê Adare de meydanan de bibê.''