Bi vengdayîşê Buroyê Aşitîye yê Cinîyan (CENÎ) û Yewîya Cinîyan a Kurdan a Almanya (YJKE) xeylî cinîyî bajarê Kolnî yê Almanya de ameyî têhet û amadekarîya Festîvala Cinîyan a Zîlane ya 15’ine ya ke 22’yê Hezîrane de do bêra viraştene, girewte dest.
Festîvala Cinîyan a Zîlane ya 15’ine ya ke her serre Almanya de yenê viraştene, emser do Leverkusenî de bêra viraştene.
Cinîyê ke bi vengdayîşê CENÎ û YJKE Koln de ameyî têhet, amadekerdişê festîvale ercnayî. Kombîyayîşo ke heme eyaletanê Almanya ra temsîlkarêk tewrê ci bîye, cinîyê Êzidîyan û Elewîyan zî cayê xo girewt. Rojdemê sereke yê festîvale yê emserî xoverdayîşê grevê vêşaye yo. Festîvale de xoverdayîşê dayîkanê laçigsipîyan, çalakîyê fedayî yê demê xoverdayîşê grevê vêşanîye yê ke bi serkêşîya Hemsereka KCD’yî Leyla Guvene semedê wedaritişê tecrîdî bi slogana ‘Xoverdayîşê Cinîyan azad keno’ do bêro vîrardene. Hetê bînî ra tewrbîyayîşê xeylê sazgehanî rêxistinanê cinîyan, HDP, sendîkaya karkeranê Almanan, parlamenterê Alman û Ewropa zî do tede cayê xo bigêrê.
Festîvale de seba doman zî amadekarîye ameye kerdene. Panelê fesîtvale yê emserî do bi nameyê ‘Şîdetê serê cinîyan polîtîk o, beno ke a ti zî bibîyêne’ bêro viraştene. Panelo ke cinîyê ciwanî, rêxistinê cîyayî yê cinî û temsîlkaranê YJKE do ca bigêrê saete 10:30 dest pê bikero. Xeylî hunermendî tewrê çalakîye benê. Festîvale wayîrê bernameyêkê dewlemendî ya. Hunermendan ra Eylem Aktaşe, Chopy, Denîz Demane, Serhet Ergîcan do sehne bigêrê. Hetê bînî ra gruba Erbane û skeç zî estê.mReya verêna festîvale de werdê herêmkî do bêrê dayîşşinasnayene. Werdê Rojawanî, Rojakewtene, Almanan, Dêrsim-Kerboran, Mêrdîn, Serhat û Riha zî bêrê pêşkêşkerdene.
