Bedîa Şîmşeka dayîka birayanê Mûrat û Sûat Şîmşekî yê ke grûba verêne ya grevê vêşanîye de bî ard ziwan ke înan soz dabi 8 ganan ke ê do na çalakî bi serkewtişî biqedînê û no soz ame bicaardene.
Keyeyê Mûrat Şîmşeko ke Zîndanê Rîze de grûba verêne ya grevê vêşanîye de bi û Mûrat Şîmşeko ke Zîndanê Kurkçulerî de grevê vêşanîye de bi, dimayê serkewtişê xoverdayîşî nefesêk girewt.
Keyeyê Şîmşekî yo ke 55 serrî cuwa ver Mêrdîn ra şiyo Edene de xo ca kerdo, xoverdayîşê xo zî xo ya pîya kirişto tîya. 9 birayan ra Sûat 2011 de sereştişêk de ameyo tepiştene û rixmo ke dosyaya ey de çîyêk çîn o 32 serrî ceza dîyaya ci. Sûato ke Zîndanê Rîze de yo xoverdayoxanê verînan ra yo. Mûrat zî Zîndanê Kurkuçulerî de çalakîya xo daye domnayene. Birayê ke qedîyayîşê çalakîye ra dima yenê tedawîkerdene, rewşa înan hol a.
Dayîke Bedîa Şîmşeke qalê tengayîye ke înan wextê grevê vêşanîye de antî kerd û ard ziwan ke ê bi pêvînayîşê Ocalanî û mesajê ey zaf bîyî şa. Şîmşeke va: ’’Bi qerardarîya ewledanê ma û mucadeleyo ke dayîkanê laçigsipîyan seba ke domananê xo bidê ciwîyayene meydanan de da ma ser kewtî. Ma dayîkî her tim kiştê domananê xo de yê. Tena ewro na çalakîye de nê tim û tim ma pê paştê domanê xo de yê. Înan vatêne qey ma peyser game erzenê. Ma çi rey peyser game nêeşte û do meerzê. Mucadele ma rê şehîdanê ma ra mîras mend. 8 ganê ma yê ke no mucadele de xo feda kerd, înan rê sozê ma yê serkewtişî estbi. Zaf şukur ma no sozê xo tepişt.
