Dayîkê Şemeyî seba ke aqûbetê vîndîbîyayan bipersê û berpirsîyarî bêrê muhakemekerdene hewteyo 741’inî de waşt Meydanê Galatasarayî yê Taksîmê Stenbolî de bêrê têhet.

 Polîsan reyêka bînê vernîya dayîkan birnayene û naye ser o dayîkan çalakîya xo vernîya Beşê Komela Heqanê Merdiman (ÎHD) a Stenbolî de viraşte. Xeylî kesî beşdarê çalakîye bîyî. Fotografê vîndîbîyayîyan ameyî akerdene. Çalakîya nê hewteyî de Dayîkanê Şemeyî aqûbetê Veysek Guney o ke 28’ê Kanûne 1980 de Dîlok de ameyo destbendkerdene û bado ameyo dardekerdene û vîndîkerdene persayî. Eşkerayîya ne hewteyî kênaya Huseyîn Taşkaya yo ke serra 1993 de Siwêregi ya Riha de ameyo vindîkerdenen Serpîl Taşkaya daye. Taşkaya ard ziwan ke rîyê polîtîkayanê AKP’yî ra Tirkîya de huqûq û demokrasî nêmendo û vat, “Tirkîya de her çiqas îqtîdar bivurîyo zî, feraset timî eynî feraset o. Nê 742 hewte yê vera sîstemî ma wazenê kiştoxî bêrê muhakemekerdene û vîndîbîyayî bêrê dîyayene.” Apê Veysel Guney, Dogan Guneyî zî ard ziwan ke birazayê ey 38 serrî verê cû hetê dewlete ra ame dardekerdene û vîndîkerdene û vat, “Dewlete ma muxtacê gorêk kerd. No 38 serrî yo dejê ma qet kêm nêbi. Ma wazenê heme kiştoxî verê edaletî de hesab bidê.”