Endama Koordînasyonê PAJK’î Delal Nûrhake peyamê Rayberê Şarê Kurdî Abdullah Ocalanî yo ke bi rayîrê avûkatan şawito, ercna.

Rayîrê Çareserîya Sîyasî ya Sûrîye

Peyamê Rayberê Şarê Kurdî Abdullah Ocalanî de peyamêk zî derheqê rayîrê çareserîya sîyasî ya Sûrîye bi. Nûrhake derheqê na babete de vat, “Seba famkerdişê polîtîka û sîyasetê herême ganî merdim polîtîkayanê dinya û herême baş fam bikero. Yanî seba famkerdişê çîyanê ke Sûrîye de qewemîyê, ganî polîtkayê DYE û Rûsya baş bêrê famkerdene. Ewro şero serdin werte  ra wedarîyo û kapîtalîzm globalîzê bîyo, aye ra têkoşînê sîyasî têmîyankewte û nerm bîyê.  Her game de her çi eşkeno bivurîyo. Qerarê DYE yê  Sûrîye ra antişî, seba awankerdişê rojdemî û zelalkerdişê rewşa hemsencî ya. Nêzdîbîyayîşê DYE yê ancîyayîşî, nêzdîbîyayîşêkê taktîkî bi. Yanî stratejîk nêbi. Rûsya û DYE Rojakewtena Mîyanêne de şer kenê. Hemberê nînan de xoverdayîşê şaran esto.

Rojawanî têkoşînê vera DAÎŞ’î de îradeyê xo mojna û rayberîya xoserîya demokratîke awan kerde. Seba seveknayîşê nê destkewteyan ganî Sûrîye biba welatêko demokratîk. Senî ke Rayberîye dayo zanayene, ganî yewparebîyayîşê Sûrîye bêro esasgirewtene û ganî bîyayîşê Kurdan  ê sîyasî bibo qanûnî. Ganî heme şar bieşkeyo îradeyê xo rayberîye de bivîno. Sûrîye de xeylî neteweyî estê. Nê zî dewlemendîya kultur û sîyasî ya Sûrîye yê. Modelê Rayberîya Xoserî ya Demokratîke Vakurê Sûrîye de bîye modelêk û xo rayra bena. Çareserîya Modernîteya Demokratîkî ya Rayberîye nika ware de bîya pratîk. Kurdî, Erebî, Suryanî û neteweyê bînî binê banê rayberîya hempare de îradeyê xo temsîl kenê û tewrê xebatanê îdarî benê.

Cinîyan Morê Xo Da Binê Têkoşînî Ro

Nûrhake qalê xoverdayîşê grevê vêşanîye kerd û vat, “Hemraya ma Leyla Guvene serkêşîya nê xoverdayîşî kerd. Dima hemrayê ma Nasir Yagiz dest bi çalakîye kerd. Dima gruba Strasboûrgî û hepisxaneyan dest bi grevî kerd. Amanca nê çalakîyan o bi ke tecrîd bêro wedaritene û serdestdarîya faşîst a  AKP û MHP’yî bêra rijnayene û pûçkerdişê planê hêzanê komloye bi. Dima 30’ê Nîsane û 30’ê Gulane de 30 hevalan dest bi rojeyê mergî kerd. No tewir, yeno manaya bêsînorîya îradeyê merdiman. Nê grevê vêşanîye seba têgêrayîşê ma û tewirêk xoverdayîşî yê neweyî îfade keno.

Nê çalakîyê ke bi serkêşîya Leyla Guvene ameybî destpêkerdene seba têgêrayîşê ma yê cinîyan nêtîceyê muhîmî vetî werte. Însîyatîf kewt dest şarê ma û mîlîtananê xoverdayîşî. Xoverdayîşî xo wareyanê mîyanneteweyî de zî mojna. Her cayê dinya ra peyamî Leyla Guvene rê ameyî û ruhê xoverdayîşî yê hemparî ame awankerdene. Reyêka bîne vejîya werte ke xoverdayîş ser kewt. Bi peyama Rayberîye grevê vêşanîye ameyî qedênayene. Xoverdayîşê ma nêqedîya, teyna şekilê xo bedilîya. Tecrîdê serê Rayberîye bi temamî hîna nêameyo wedaritene. Eynî wext de her roje vera şarê ma hêrişî yenê kerdene. No proses bi çalakîyanê cîyayîyan û xoverdayîşan do dewam bikero.”

Nûrhake derheqê peyamê Ocalanî yê serê cinîyan zî vat, “Qirkerdişê serê cinîyan teba qirkerdişê  cimatî dewam keno. Seba ke sîstemo kapîtalîst cimatî hemênayeno, her ca de probleme gird ameyê pêser. Ganî têgêrayîşê mîyanneteweyî, cinî û ciamtî bêrê têhet û têkoşînê azadîye xurt bikerê.”