Meclîsê Cinîyan ê DEM Partî seba ercnayîşê weçînayîşan, prosesî û xeta xo ya têkoşînî bi beşdarîyan hemserekanê şaristanan kom bi.

Vervatoxa Meclîsê Cinîyan ê DEM Partî Halîde Turkoglu kombîyayîşî ra verî qisey kerd û rojdem ercna.

Halîde bale ante serkewtişê weçînayîşan ser û vat: ''Netîceyanê weçînayîşan mojna ke cinîyî cuyêka senîne wazenê. Xîret yeno kerdene ke sîstemê hemserekîye bêro krîmînalîzekerdene. La sîstemê ma bi rayan şarî rê destek dî. Cinîyan israrê xo yê seba cuyêka bêşer û bêşîdetî weçînayîşan de eşkera kerd. Cinîyan polîtîkayê çaresernêkerdişê meseleya kurdan rijnayî. Roje roja pîlkerdişê têkoşînê ma ya. 

Wezîrîya Edaletî vengê Emîne Şenyaşar peygoş kena la partîya ma û cinîyan kena hedef. Wezîrîye ganî hûrmetê îradeyê cinîyan û sindoqan bikera. Êyê ke partîya ma kenê hedef wa hol bizanê ke şar do destûr nêdo qefilnayîşê partîye û qeyûman. 

11 cinîyê tepişteyî seba ke grevê vêşanîye de yê raştê cezaya hucreyî ameyî. Wezîrîya Edaletî ganî vera tecrîdî têbigêra. Vervejîyayîşê tecrîdî sûc nîyo. Tecrîdkerdiş sûc o. Rojnamegerî Mehmet Aslan, Esra Solin Dal û Erdogan Alayamut seba ke Roja Rojnamegeranê Kurdan fîraz kerde tepişîyayî. Ma na hişmendîye lanet kenê.

Ma vera polîtîkayanê şer û şîdetî yê îqtîdarî wayîrê hêzê têkoşînî yê. Ma sey cinîyan her ca de nê polîtîkayan teşhîr bikerê. Tecrîd de israr şer û krîzan de israr o. Ma do pêro şaredarîyanê xo de seba cinîyan warê cuye awan bikerê, cinîyan îstîhdam bikerê. Ma do paradîgmaya azadîgîra cinîyan a Ocalanî her ca de bîyarê ca.

Ma do hêdî hêdî kongreyanê xo yê qezayan bikerê.''