Vervatoxa DEM Partî Ayşegule Dogan derheqê kombîyayîşê Heyetê Rayberdişî yê Merkezî de yo ke proses û xerîtaya rayîrî girewt dest, merkezê pêroyî yê partî de kombîyayîşê çapemenîye kerd.

Ayşegule Dogan ard ziwan ke babetê kombîyayîşê înan a verêne ronayîşê komîsyonê meclîsî yo û veng da Serekê Meclîsî Numan Kurtulmuşî ke wa înîsîyatî bîgiro.

Ayşegule Dogan nê vatî: " No înîsîyatîfo zaf şenik o. La semedê çaserkerdişê meseleyêka girane do berpirsîyarîya tarîxî  bigîro xo ser. Coka gerek çew cîddî ci rê bibo nizdî. Na mesele bi nizdîbîyayîşê şenikî nîna çareserkerdene. Birêz Kurtulmuş hema ke meclîs tehtîl nêkewto eşkeno semedê ronayîşê komîsyonî berpirsîyaranê partîyanê sîyasîyan kom bikero. Mesleya kurdan têna meseleya kurdan nîya. Çîyo ke ma ciwîyayî îspatê nê yê.Meclîs gerek cade înîsîyatîf bigîro. Sey DEM Partî semedê komîsyonî hazirîye û vernîyazê ma est ê."

Ayşegule Dogan qiseykerdişê xo rê wina dewam kerd: "Ma sey DEM Partî semedê şîyayîşê Îmraliyî hazirîya xo kenê. Ma plan kenê ke demê tewr kilmî de Îmraliyî zîyaret bikerê. Hemserekê ma zî tede endamanê Heyetê Rayberdişî yê Merkezî ra heyetêkê ma do demê tewr kilmî de Îmraliyî zîyaret bikero. Beno ke Birêz Ocalan rojanê verê ma de temsîlkaranê partîyanê sîyasîyan ê bînan de bêro têhet.

Eke merdim giranîya mesele bifikîrîyo; pêvînayîşê bi Birêz Mesut Barzanî, Birêz Neçirvan Barzanî, Birêz Mazlûm Ebdî, Birêz Qubat û Bafil Talabanî do feyde bikero. Ma zanê ke wazeno nê pêvînayîşan bikero. Ma wazenê nê zî rayapêroyîye rê pare bikerê. No waştişê Birêz Ocalanî yo. Ma zî vanê feyde keno. Pêvînayîşê ci yê bi rayberanê partîyanê sîyasîyan ê cîya cîyayan û şexsîyetanê muhîman zaf muhîm vînenê. Semedê prosesê verê ma zî hewce keno. Birêz Ocalan metnê perpektîfî de yo ke rêxistina xo rê şawit warê munaqeşeyî yo hîra akeno. Binate de semedê înşakerdişê cuyeya newî keda pîle, xîret, qerardarîye û xoverdayîş est o. Heme hetê ke wazenê Ocalanî reyde pêvînayîş bikerê gerek bieşkê pêvînayîş bikerê. Seba ke proses aver şiro gerek kam ke hewce keno tede temas bêro ronayene."