Dewa Sumulke ya qezaya Xozatî ya Dêrsimî de 14ê hezîrana 2020î de camêrdê bi nameyê Seyfullah T.yî (30) dımana 9 serre 2 reyî îstîsmar kerde. Tepiştetîya 6 mengan ra dima bi şertê kontrolê edlîyî Seyfullah T. vera dîya.  

Dadîya domane M.K. vera veradayîşê îstîsmarkerî nêrazîbîyayîşê xo mojna.

Dadîye M.K. pare kerd ke ê seba tatîlî Mersînî ra şîyî Dêrsim, dewa Sumulke de xalê xo zîyaret kerd û îstîsmarkerî hetê xalê ci de şiwanîye kerdêne. Dadîye M.K. vat: ''Domana mi vat ke Seyfullah T.yî wexto ke a herî ra ardêne war îstîsmar kerde. Mi merdimanê xo rê vat la înan vat domana mi xelet fam kerda. 5 rojan ra dima domana mi vat ke Seyfullah Tyî reyna a îstîsmar kerda. Kênaya mi wextê nê îstîsmarî de paskil eşto ey û xo xelisnaya. Ma pawit ke dewijî Seyfullah T. teslîm bikerê la wina zî nêbi. Ez şîya mi Asayîşê Xozatî rê gerreyê şiwanî kerd. Seyfullah T. îfadeyê xo yê nakokî ra erzîya zîndan. La 6 mengan ra dima xalanê mi derheqê ci de îfadeyo zûrayîn da û îstîsmarker vera dîya. ''

Dadî M.K. pare kerd ke xalê ci tira teda kenê ke wa gerreyî ra fek vera bidê û vat: ''Xalê mi û xalzayê mi ameyî keyeyê mi. Nînan vat 'To nameyê kênaya xo veto. Ez do 200 hezar bida şiwanê xo uja ra veja. Eke o şiwan vejo ti zî dadî û babîyê to zî bikişo.' Ma zaf qerqilîyenê. La ez do reyna gerreyê ê şiwanî bikera. Heyetê mehkeme roniştiş de nêverda ez qisey bikera. Pêro beyanê zûrayînî zî vejîyayî werte.''

Xalê M.K. V.K.yo ke Seyfullah T.yî rê şahîdîye kerda îdîa kerd ke dewa înan de serebûtêko winasên nêqewimîya.