8ê Adare Roja Cinîyan  a Dinya Dêrsim de bi mîîtngêk ame pîrozkerdene. Mîtîngo ke hetê Platformê Cinîyan ê Dêrsimî ra ame organîzekerdene xeylêk kesî tewrê ci bîyî.  Cinîyî Kuçeyê Sanatî ra ver bi Meydanê Seyîd Rizayî rayra şîyî. Wekîla DEM Partîya Dêrsimî Aytene Kordu, Wekîla EMEPî ya Dîlokî Sevda Karaca û namzedê şaredarîye yê îtîfaqê Dêrsimî tewrê mîtîngî bîyî.

Bi nameyê platformî Serab Kahraman vera hêrişê îqtîdarî yê vera cinîyan û şaran nêrazîbîyayîş mojna û bale ante serê têkoşînê cinîyan ke her tim girdêr beno.

Sevda Karaca zî vist vîrî ke cinîyê Dêrsimî ke semedê miqatbîyayîşê domananê şewe û roje xebityenê raştê tacîz û hêrişê çekdarî yê leşkeran yenê û vat  bajaro ke derûdorê ci bi qereqol, kelegol, polîs û leşkeran girewte yo, tede cinîyî yenê vînîkerdene, Gulîstane Doku ra hema zî xebere çîn a.

Aytene Kordu zî bi vîrardişê Zarîfe, Sakîne, Arîne Mîrkanan dest pê qiseykerdişê xo kerd. Kordu bale ante grevê vêşanîye yê zîndanan ser û nê vatî:  ''Camêrdê ke şeran vejenê wa bizanê ke hêzê ma cinîyan est o ke ma na herre de haştîye awan bikerê.  Ma xoverdayoxanê zîndanan tîya ra selam kenê.  Heta ke meseleya kurdan çareser nêbo, caardişê antîdemokratîkî do dewam bikerê.  Bajarê ma de her ca de qereqolî nayî ro, bêkarîye her roje zafêr bena. Wazenê ke bajarî bikerê bêmerdim.

Ma sey cinîyan ê Dêrsimî tim pîya yê, ma do rêxistinbîyayîş û têkoşînê xo xurtêr bikerê.  Ma wayîrê bawerîya qedîme yê.Ma sey şarê kurd û elewîyan vera qirkerdişê cinîyan, xoza û her qeyde qirkerdişan do têkoşîn bikerê. Welatê ma de qiştoxê cinîyan yew bêrî kewnê zere û berê bînî ra vejîyenê. Bi operasyonanê vera têgêrayîşê cinîyan şima nêeşkenê ma bitersnê. Îqtîdarê AKPyî ke wazeno ma bişawo keyeyanê ma wa bizano ma cinîyî do têkoşînê xo her roje xurtêr bikerê. Ma do Kurdîstan  û Tirkîya de her ca de bê.''

Mitîng kuwayîşê erbenayan, vatişê deyîran û girewtişê govende qedîya.