Şarê Dersimî yo ke çar koyê ci dormeyê ci pê qereqolan û kêlakolan ame girewtene înan rê ameyî qedexekerdene, sey her wextî erdê xo de zorîya nê qedexeyan ancenê.

Hatîce Donmeze rîyê qedexeyan û tedayan ra nêeşkena şora dewa xo, mecbur menda ke cuya xo yew apartman de mabênê  dêsan de bidomne. Dayîke Hatîce ke seba hetkarîye rêxistine ameye sucdakerdene û kewta mahkemeyan û 20 rojî zîndan de menda, tedayan ra dewa xo ra bar kerd. Donmeze zaf bihêrs a ke erdê pîr û kalanê xo ra ameya vetene, û weşîya aye têmîyan bîya. Donmeze vana: "Nika her ca de qedexeyî estî. Me ne eşkenê kolîyan bişiknê, ne eşkenê mêşnayan weyî bikê ne zî eşkenê vaşan biçînê. Ma pê şaş mendê, ma se bikê. " Donmeze teyna wazena ke rojanê rindekan de bi haştîye weşîya xo bidomne û wina vana: "Ma wazenê bigêrê a dewanê xo, la ma nêeşkenê. Eke ma şorê cayêk çar rey ma vindernenê persenê: 'Şima şîyê kotî, senî şîyê, şima se kerd?'." Dayîke Hatîce ard ziwan 4 kesî keyeyê aye ra zîndan de yê û va: "Wa haştîye biba. Gêncî wa zîndan ra vejê. Herkes cuya xo bidomno. Teyna way û biratîye bêra ma rehet kenê."