8ê Adare Roja Cinîyan ê Kedkaran a Dinya de cinîyan ê Dêrsimî Meydanê Seyîd Rizayî de mîtîngêkî reyde şayîyêke viraşte. Warê mîtîngî de coşêko pîl estbi û cinîyan mîtîng de vera sloganê sey 'Cinîye, Cuye, Azadîye' vatî. Cinîyan mîtîng de dahol û zirna reyde govende girewte.

Mîtîngî pê qiseykerdişê Endama Platformê Cinîyan ê Dêrsimî Fatma Argin Taşkale dest pêkerd. Taşkale îfade kerd ke vera serdestîya camêrdan, bêtêdûştîye, şîdet, şer, kedwerdiş û xizanîye cinîyî reyna vejîyayî meydanan. Taşkale da zanayene ke ê bi têkoşînî xîret kenê ke verê polîtîkayanê teda, şîdet û çimtersnayîşî bigêrê. Taşkale bale ante rewşa zîndanan ser û waşt ke sere de Aysele Tugluk wa pêro tepişteyê nêweşî bêrê veradayene. 

Endama Heyetê Rayberdişê Merkezî yê Partîya Herêman ê Demokratîkan (DBP) Bêrîvane Sîncar verî cinîyê sîyasetmedarî yê tepişteyî selamm kerdî û dîyar kerd ke ê vera şer, qirkerdiş û şîdetê serê cinîyan her cayê Kurdîstanî de vejîyê waran.

Platformê Cinîyan ê Kurdan ê Yewbîyayeyî mesajê xo de pê hesna ke çar hetanê Kurdîstanî de cinîyê kurdî do bi qîrayîşê 8ê Adare yewîya cinîyan ê kurdan awan bikerê, tarîx û kulturê xo bi ziwanê xo binusê. 

Qiseykerdişan ra dima  cinîyan deyîranê koma muzîkî ya Şaredarîya Dêrsimî reyde govende girewte.