Endama Komîteya Merkezî ya PKKyî Xalîde Engîzek bi wesîleya 8ê Adare Roja Cinîyan ê Kedkaran a Dinya  ANFyî rê qisey kerd.

Qiseykerdişê Engîzeke bi kilmî wina ya:

''Ez verî pêro cinîyan ê şehîdan, bi taybetî ê şehîdanê Garê, şehîdanê YPJ, YJŞ, HPJ, YPS-JIN û YJA-starî bi hûrmetî yad kena. Ez 8ê Adare yê pêro embazan, bi taybetî ê embazanê tepişteyan fîraz kena.

Têkoşînê azadîye yê cinîyanê kurdan ma rê sey berdewamê mîrasê têkoşînê cinîyanê dinya yê. Têgêrayîşê azadîye yê cinîyanê Kurdîstanî  pa PKK geş bîyo û dinya ra vila bîyo. Têkoşînê cinîyan amebi astengkerdene, bêhêvîtîyêke estbî la têgêrayîşê ma no têkoşîn kerd gandar, vet asta tewr berze. Bi taybetî roja ma ya ewroyîne de dima ke Rayber Apoyî bire daye xelisnayîşê cinîyan pêro cinîyan rê dîyarî bikero têkoşînê ma zaf bi xurtêr. Bi taybetî şerê ma yê vera DAÎŞî hêz da pêro cinîyanê dinya. Ma sey cinîyan ê kurdan bi xobîyayîşî 8ê Adare rojêka sembolîke ra xelisna û ma kerd roja rojdemê azadîya cinîyan.

Cinîyan ê kurdan pê lesefeya Rayber Apoyî xo şinasna, rêxistin kerd û têkoşîn kerd. Paradîgmaya Rayber Apoyî de oyo binge û hêzo verên cinî yê, paradîgmaya ey bingeyê xo cinîyan ra gêno. Rayberîya ma xeta 'Cinîye, Cuye, Azadîye' ronaye. Ma Rayber Apo têna sey Rayberê xo nê sey afernayoxê cuya azade û embazê tewr samîmîyî zî vînenê. Cinîyî bi taybetî seba azadîya Rayber Apoyî nika têkoşînê cuya azade berz kenê.

Şorişê Rojawanî rayberîya cinîyan de geş bi, aver şi. Hêzanê hegemonîkan seba menfaatanê xo şorişê ereban ê 'Wisarî' berteref kerd. Bi nê hawayî Rojhelatê Mîyanênî de alozî, krîz, kaosî reyna xorin bîyî. Bi taybetî DAÎŞ û El Nûsra ra dima şîdet zî tede zêdîya. Şorişê Rojawanî nê atmosferî de ame kerdene û nê şorişî rayberîya şaranê Rojhelatê Mîyanênî kerde. Bêgûman nê têkoşînî de cinîyê Rojawanî tewr vernî de ca bîyî. Cinîyan ê kurdan ê Rojawanî bi nê hawayî morê xo da binê tarîxê merdimîye û îsbat kerd ke cinîyî eşkenê şarê xo bipawê.  Nika cinîyî Îdareyê Xoserî yê Rojawanî de ca gênê û sîstemê hemserekîye her ca de temsîl kenê. Cinîyê Rojawanî zaf aver şîyî. Înan zewajê bi xeylêk cinîyan, berdel, halîn, zewajê domanan qedexe kerdî. Cinîyê erebî nê têkoşînî de hetê cinîyan ê kurdan de ca gênê. Bi taybetî wextê hêrişanê DAÎŞî de cinî û dadîyan ê ereban tim hetê MSD û QSDyî de ca girewt û şehîdî dayî. Cinîyê erebî zî vera îşxalan vejîyenê û wayîrê îdareyê xoserî, paradîgmaya Rayber Apoyî vejîyenê. Çunke ê ameyoxê xo mîyanê înan de vînenê.

Têkoşînê azadîye yê cinîyan ê kurdan komel de xeylêk vurnayîşî kerdî. Rayberîya PKK û Rayber Apoyî de cinîyan çeke girewte xo destî, camêrdan  rexneyê xo dayî û bi nê hawayî wird cînsîyî zî aver şîyî. PKKyî verî komel analîz kerd û dima babeta vurnayîşê sosyolojîkî xo rê kerd rojdemê verênî. Rayber Apoyî pawitişê xo de vatêne 'Seba ke Kurdîstan û Rojhelatê Mîyanênî de vurnayîşê bingeyî bibê ganî şorişê wijdan û hîşmendî bêro awankerdene.' PKKyî ewnîyayîşê komelî yê bi cinîyan hîşmendîya komelî vurnayî. Cinîyan ê kurdan azadîya xo viste destî çewî ra nêwaşte. Ma pêro eşîr, aga, beg, feodalîte red kerdî û metodê xopawitişî, metodê rêxistinîye, metodê têkoşînî xo rê esas kerdî. Coka cinîyê kurdî hende bala dinya û Rojhelatê Mîyanênî ancenê û mîyanê ma de enternasyonalîstî ca gênê.

Seserra 21. de şîdetê vera cinîyan bi hawayêkê sîstematîkî ame zêdînayene. Cinîyan emser yanî serra 2020î de têkoşînê xopawitişî geş kerd. Cinîyanê dinya zî cinîyan ê kurdan ra îlham girewt û xopawitişê xo îlan kerd. Cinîyî hînî sîstem, dewlet û camêrdan ra çîyêk nêpawenê û eşkenê xo bipawê. Xora nê unsurî cinîyan nêpawenê qetil kenê. Babeta xopawitişî de îmtîhanê cinîyan ê kurdan ê gerîlayan estbi.  Pê artêşbîyayîşî cinîyan xo rê xeta Bêrîtane kerde esas. Hînî cinîyî xo pêro waran de pawenê. Xeta artêşbîyayîşê YJA-Starî xeta Bêrîtan a. YJA-Star bi serran o rolê xo yê pawitişê xo û şarê xo bêkêm ano ca. Tewr peyên ma Garê de tewirê YJA-Starî dî. Xoverdayîşê Garê peynîya AKP-MHPyî ard û no zî binê fermandarîya YJA-Starî -HPGyî de bi. Naye ra ganî cinîyê kurdî û ê dinya YJA-Starî reyde xopawitişê xo bîyarê ca û wa bêrê tewrê hêzanê pawitişî yê cinîyan bibê.

Hemleyê ma 'Wext wextê azadîye yo' û 'vera qirkerdişê cinîyan cuya azade û komel bipawê' dewam kenê. Ma vînenê ke pêro dinya de xeylêk kes, şorişgêr û dezgehî wayîrê hemleyanê ma vejîyenê, ma înan selam kenê.  Nika ma ver bi 8ê Adare şinê. Ma do a roje xoverdayîşê xo pêro Kurdîstan û dinya de biresnê tewr berzîye. 8ê Adare de cinîyî wa vejîyê meydanan û zulmkeran ra hesab bipersê.  Cinîyî wa yew bibê û paştî bidê yewbînan. Nika bi bahaneya janî tebervejîyayîş îlan beno. Wa cinîyî goş nêdê nê qedexeyan. Wa zîncîrê xo biqerifnê û xoverdayîş berz bikerê. Cinîyî 8ê Adare ra heta 4ê Nîsane wa her roje çalakîyan bikerê. Ma azadîya Rayberê xo sey azadîya xo vînenê. Coka ez venga pêro cinîyan danê ke wa tecrîd bişiknê. Wa cinîyî 8ê Adare de pê şîarê 'îşxalî rê nê, wext wextê azadîye yo' meydanan bixemilnê. Ma 8ê Adare yê pêro cinîyanê dinya, ê embazanê xo yê çeperan û ê embazanê xo yê tepişteyan fîraz kenê. Ma xoverdayîşê cinîyan selam kenê û cinîyan rê serkewtiş wazenê.''