Serekkomarê Tirkîya Recep Tayyîp Erdoganî 20ê adare de bi hawayêkê tekterefî Peymana Îstanbulî wedarite, betal kerde. Peymane armanc kena ke verê şîdetê serê cinî û domananê kênayan bigêra.

Hemsereka Platformê Huqûqnasan ê Azadîpawitoxan (OHD) Ayşe Acînîklî derheqê babete de ANFyî rê qisey kerd.

Ayşe Acinîklî vist vîrî ke şîdetê vera cinîyan her roje Tirkîya de zêdîyeno û vat: ''Tirkîya de dima ke AKP bi îqtîdar rewşe vurîyaye cînayetî zêdîyayî. Mesuldarê nêpawitişê cinîyan hukmat o. Tirkîya de seba caardişê na peymane meseleyê cidî estbî. Seba ke peymane bêra caardene sîyasetêk ameyêne kerdene. Nika o zî wedarîya. Wedaritişê na peymane berhemê polîtîkaya dişmenîya cinîyan o.''

Ayşe Acînîklî îfade kerd ke şexsêk bi sereyê xo nêeşkeno Peymana Îstanbulî betal bikero û vat: ''Erkê Serekkomarî nîyo ke bi hawayêkê tekterefî peynîya Peymana Îstanbulî bîyaro. Hetê huqûqî ra derbazdar nîyo ke pê îmzayêke, pê qerarnameyêkî hetê şexsêkî ra betal biba. Meclîsî na peymane îmza kerde û tena o eşkeno betal bikero.''

Acînîklî madeya 90î ya Qanûnê Bingeyî vist vîrî û ard ziwan ke Peymana Îstanbulî seba ke peymana mîyanneteweyî ya pabesteta Qanûnê Bingeyî ya.