Endama Koordînasyonê KJK’yî Besê Erzîncane Medya Haber TV de bîye meymana programê ‚Ulkeden‘ û cewab da persanê Ararat Ararat Suveyda.

 Erzîncane ard ziwan ke binkewtişê AKP’yî weçînitişê Stenbolî de seba hêzanê demokrasîyî sebebê kêfweşî yo û halêko pozîtîf o û vat ke na netîce heman wextî de AKP-MHP lerzna.

Erzîncane bale ante serê rolê pîlî yê weçînitişan û vat, „Weçînitoxan ê Kurdan rolêko stratejîk bica ard. Hem hetê nufûse ra hem zî hetê cimatkî-ekonomî-sosyalî ra Stenbol bajarêko stratejîk o. Bajarêk de bi nê hawayî şuxulnayîşê rayanê hêzanê demokrasîyî û azadîye yê hemverê faşîzmê AKP-MHP’yî û netîceya ke vejîyaya werte seba demokrasîyê Tirkîya, seba problemê Kurdan xeylî muhîm o“Erzînccane vat ke nay ewe derbêka girane daya faşîzmê AKP-MHP’yî ro.

 ‘Şaro Kurd Pêroyîya Tirkîya de Wayîrê Vengêkê Stratejîkî yo’

Erzîncane vat şaro Kurd Tirkîya de wayîrê vengêkê stratejîkî yo û vat, “Şaro Kurd biorganîze yo, wayîrê îdeolojî, rayberîye û serkêşîye yo. Loma mucadele keno, xover dano. Gama ken ê hetî ra bêro ercnayene, do bêrê dîyene ke kam zaf Kurdan dir tîfaq bikero o het do qezenc bikero. Serkewtişê Îmamoglûyî bi nê hawayî yo. Ganî bêro zanayene peymeyê ‘Kurdî bê Tirkan nêbenê, Tirkî bê Kurdan nêbenê’ yo ke Rayberê ma eşt werte, na çarçewa de yo. Bi yewîya şaran aşitî eşkena bi ser bikewo. Xeylî muhîm o ke tîfaqê demokrasîyî bêro xurtkerdene. Hal û atmosfero ke Stenbol de vejîya werte ganî seba Tirkîya bêro şuxulnayene. Binge û avantajêko xeylî muhîm vejîya werte.”

‘Çîyo Muhîm Mucadeleyê Ma yo’

Erzîncane ard ziwan rejîmê AKP-MHP’yî bi weçînitişanê Stenbolî derbeyêka pîle werde û vat, “Ganî no tîfaqo faşîst fam bikero ke bi hêrişan ne zereyê Tirkîya de û ne zî Rojakewtena Mîyanêne de nêeşkeno bibo hêz. Tîfaqo faşîst bîyo zihîf. Beno ke biwazo polîtîkayanê xo yê very, hêrişanê xo hemverê Rojawan, Xakurkê, hemverê hêzanê demokratîkan ê Tirkîya bidomno. Meşrûtîyetê ci nêmendo. Tirkîyayijan zî weçînitişê Stenbolî de na yewe dîye. Hêzanê mîyanneteweyîyan zî dî. Çende biwazo polîtîkayanê xo yê hêrişkarîye bidomno do hîna rew biqedîyo. Tîya de çîyo muhîm mucadeleyê ma yo.”

PDK Bi Destê Xo Erdanê Xo Teslîmê Dewleta Tirkî Keno, No Hal Nêno Famkerdene

Besê Erzîncane îşxalkarîya dewleta Tirkî ya Başûrê Kurdistanî û hemkarîya PDK’yî ya bi dewleta Tirkî ke xeylî herêmî teslîmê leşkeranê Tirkî kerdê ercna û vat, “Famkerdişê rastîya PDK’yî zehmet o. Serra 1992 ra destkewteyî estê. Ûca hukmato herêmî awan bîyo. Şansêko pîl bi dest fînabi. Wareyê mîyanneteweyîyî de zî ameyêne naskerdene. Nika PDK bi destê xo destkewteyan teslîmê dewleta Tirkî keno. Merdimî nay ewe fam nêkenê. Hemverê Tirkîya de eşkayêne tewirêkê hîna biîradeyî ramotêne.”