Bajarê Tier û Marburgî yê Almanya de û bajarê Grazî yê Awusturya de semedê Jîna Emînî ya ke Îran de ameye qetilkerdene, çalakîyê protestoyî ameyî kerdene.

Trier de cinîyê kurd, fars û almanî vizêr saetanê şanî de ameyî têhet û mîtîng kerd. Mîtîng de bi ziwananê cîya cîyayan sloganê  “Jin jiyan azadî”  ameyî eştene û hukmatê Îranî ame protestokerdene. Bi desan cinîyan semedê selamkerdişê serewedaritişê Rojhelatê Kurdîstanî û Îranî gijikê xo qesna û çîtê xo vêşnayî.

Marburg de zî bi eynî waştişî cinîyî kueçyan de bî. Çalakî de qetilkerdişê Jîna Emînî ame protestokerdene û serewedaritişê şaran ame selamkerdene.

Giraz de zî kurdîstanij û dostê înanê ke ameyî têhet vera qetilkerdişê Jîna Emînî hêrsê xo ard ziwan û paştî daye serewedaritişê şaranê Rojhelat û Îranî.