Fransa de xeylêk rêxistinê cinîyan seba Sakîne Cansiz, Leyla Şaylamez û Fîdane Dogan ê ke 2013 de Paris de ameybî qetilkerdene do vejîyê meydanan. Rêxistinan venga her kesî da ke tewrê rayraşîyayîşê 8ê çeleyî bibo.
9ê çeleyê 2013î de paytextê Fransa Paris de ronayoxa PKKyî Sakîne Cansiz, Temsîlkara KNKyî Fîdane Dogan û Endama Têgêrayîşê Ciwanan ê Kurdan Leyla Şaylemez ameybî qetilkerdene.
Rayberîya Têgêrayîşê Cinîyan ê Kurdan ê Fransa (TJK-F) de Koordînasyonê Cinîyan ê Neteweyîyan ê Fransa, Rayraşîyayîşê Dinya yê Cinîyan ê Fransa, Kolektîfê Heroine, Yewîya Cinîyan ê Sosyalîstan û Yewîya Sendîkayan a Solidairesî eşkerayîyêka hempare daye û venga pêro cinîyan da ke tewrê çalakîyanê protestoyê Qirkerdişê Parisî bibê.
Rêxistinanê cinîyan ard ziwan ke ê do seba 3 cinîyan ê kurdan waran de seba 'edalet û raştîye' biqîrê û wina armanc û waştişê xo eşkera kerdî:
''-Wa hêzê peyê Qirkerdişê Parisî bêrê dîyarkerdene, muhakemekerdene û mehkumkerdene.
-Wa bahaneya 'sirê dewlete' bêra wedaritene, belge û agahîyê serê qirkerdişî bêrê parekerdene.
-Seba ke hukmatê Fransa û selahîyetdarî keyeyanê Sakîne Cansiz, Fîdane Dogan û Leyla Şaylemez qebul bikerê û hemkarîya dewaya muhakemeyê sûcdaran bikerê ma do meydanan de bibê.
-Seba ke ma meverdê faşîzm aver şoro ma pîya cuyêka azade bipawê.''
Rêxistinanê cinîyan bernameyê xo yê çalakîyan zî eşkera kerd. Bername wina yo:
8ê çeleyî
Paris: Rayraşîyayîş-mitîng, Saete: 12.00 Gare Du Nord
Strasbourg: Rayraşîyayîş-mitîng, Saete: 13.00 Place de la Gare
Marseille: Rayraşîyayîş mîtîng, Saete: 13.00 Canebiere/Marseille
Bordeaux: Rayraşîyayîş mîtîng, Saete: 18.00 Place Stalingrade
9ê çeleyî
Toulouse: Mitîng, Saete: 14.30 Îstasyonê Metroyî yê Jean Jaurès
