Fermandara YJA-Starî û Komîteya Newe ra Awankerdişê PKKyî Vîyane Soran (Leyla Walî Huseyîn) seba ke tecrîdê giranî yê vera Rayberê Şarê Kurdî Abdullah Ocalanî protesto bikera 2ê sibata 2006î de bedenê xo da adirî ver û pê têkoşînê xo yê xeta azadîya cinîyan bîye raybera cinîyan. Vîyane peyê xo de xîretê têkoşînî û waştişê azadîye sey mîrasî verda.

Vîyane Sorana ka eşîra Cafî ya Başûrê Kurdîstanî ra ya 1981 de şaristanê Silêmanî yê Başûrî de dadîya xo ra bîya. Vîyane 1997 de tewra gerîlayan bîye. Keyeyê ci waşt aye apey bero la Vîyane nînan rê vat: ''Ez do qetî şima de nêraç Ez şina cayo ke ez tede bena azad.'' Vîyane Soran mîyanê serrêke de bena fermandarêka YJA-Starî.

Vîyane Soran wexto ke koyan de têkoşîn kerdêne Komployo Mîyanneteweyî yê vera Rayberê Şarê Kurdî Abdullah Ocalanî ame kerdene. Bi desan gerîla û welatperweran 15ê sibata 1999î de bi şîarê 'Şima nêeşkenê tîja ma tarî bikerê' bedenê xo dayêne adirî ver. Vîyane zî bikera 2ê sibata 2006î de Heftanîn de vera tecrîdê Îmraliyî bedenê xo da adirî ver.

Mektuba ke Vîyane Soran keyeyê xo û Rayberê Şarê Kurdî rê verdaya wina ya:

''Keyeyê min o ercîyaye

10 serrî yo îmkananê têkoşînî ra û seba ke ez şima rê hêrsbîyaye bîya mi şima rê mektube nêşawite. Tewr vernî de tewrbîyayîşê mi şima rê tay bi mesele. La 10 serran ra pey ez hêvî kena ke şima tewrbîyayîşê mi fam bikerê. Şima keyeyêkê nê şorişî yê. Nêbeno ke şima berê xo embazan û fikr û armancanê kênaya xo rê biqefilnê. 

Şima ganî tewrbîyayîşê cinîyêke rê sey meseleya şerm û namusî nêzdî mebê. Ganî şima hînî mekewê kanwazîya komelî û îtîraf bikerê ke cinîyî sey gandarêkê komelkî qebul bikerê. Hînî wextê şima zî ameyo ke şima qerar bidê. Ganî şima wayîrê tarîx, xoverdayîş, çêrîya şarî vejîyê.

Wexto ke ez şima ra cîya bîya 15 serre bîya nika ez 24 serre ya. Ez şima ra rîca kena ke tay objektîf bê û xo rê persê: 'Na kênaya ma se kena, senî û qey çî têkoşîn kena. A zî nêeşkena sey Awaz, Xalit û ê bînan abigêra û seba xo biciwîya?'

Wa hînî embazî bêrê keyeyê şima, şima zî şorê hetê înan. Mektubanê mi biwanê, ROJ TV sey bikerê û goş bidê Dengê Mezpotamya, kitabanê Rayber Apoyî biwanê. O çax şima fam kenê ke kênaya şima çira no rayîr weçînayo. 

9 serrî yo qetî ez poşman nêbîya û nêkewta mîyanê îxanetî. Mi PKK de zaf çîyî fam kerdî û naye ra ez rûmetên a. Mi fam kerd ke ganî ez dadî, way û birayanê xo ra hes bikera. Wextêk ez şima rê zaf hêrs bîya û mi vatêne 'Çira ê mi fam nêkenê?' La dima ez pê hesîyaya ke sûçê şima çin o. Sebebê tewrê şima meseleyanê sîyasetî û hişmendîye ya bi seserran ra yeno.

Na çalakîya mi vera sîtasetê înkarî û tecrîdê serê Rayber Apoyî cewab a. Zaf qîm o ke cinîya sey mi xo feda bikera. Mi waştêne şima rê yew bi yewe çîyêk vaja, çîyêk binusa la çalakîye rê çend saetî mendî. Ez tewr peynî de wazena vaja ke rîca kena ke metod û armancê mi hol fam bikerê û biercnê. Çunke ez seba naye ciwîyaya û seba ney planê xo yê şehadetî weçînayo. Ez wesîyet kena ke Awaz reyna abigêro koyan û çeka xo bigêro. Çunke ez tira zaf hes kena. Reyna ver mevejîyê ke cinî û camêrdê bînî zî xo û ameyoxê xo bişinasê û wayîrê îradeyî bibê.

Tewr peynî de ez selam, heskerdiş û hûrmetê xo pêşkêş kena, hêvî kena ke şima rûmetên û şay bibê.

Serekê mi;

Roja ke ez nameyê to eşnawit û ti şinasna a roje ra nata ez hîs kena ke ciwîyena, zanena kam a û senî biciwîya. Fikranê to mi rê qala mi kerde û cuya manadare musnaye ma. Ez dibistana to de qetî şik nêkewta û poşman nêbîya. Ez sey cinîya kurde azadîye xo rê kerda esas û ez zerrî ra pê nê armancî bawer bîya. Coka mi waştêne rayêk zî bo ez to bivîna, verar şora to ra û meseleyanê azadîye û cinîye to de nîqaş bikera.

La Komployê 1998î mabênê mi û to de cîyatîyêke viraşte û nê komployî sey mi hêvîya embazanê bînan zî cêkerd. Esaretê to ra dima zerrîya mi de lerzêko pîl qewimîya û zerrîya mi de qerardarî û azadîye hîna bîyî geş. Mi qetî hêvîya vînayîşê to vînî nêkerde. Coka mi tim zereyê xo de to de dîyalogî kerdî. Mi wina hîs kerd ke ti zerrîya mi de yew enerjî û veng î. Û mi naye ra îlham girewt.

Ti zaf reyî bîyî meymanê hewnanê mi û ez naye ra zaf şa bîya. La ez pêro hîs û fikranê xo nêeşkena bîyara ziwan. 1999 ra dima mezgê mi de raştîyêke zimîyena û vana o merdim uca heq nêkeno. Ez têna dewletê sextekarî sey mesuldarê nê komployî nêvînena; ez û embazê mi zî ma kêm mendî û qels mendî. 

Ewro 15ê sibata 2006î de ma dekewenê serra 8. ya esaretê Rayber Apoyî. Bi nê komployî serê Îmrali û şarê kurdî de prosesêko tehlukeyîn dîya destpêkerdene. Ê wazenê xîretê azadîye yê Rayber Apoyî û şarê kurdî pûç bikerê. Wina veng danê ke teslîm bibê û ma Rayber Apoyî ra fek vera bidê. Ê wazenê ma terbîye bikerê û cuya bê Rayberîye û bêîrade ma rê ferz bikerê. Coka her cayê dinya ra merdimî vera sîyasetê înkar û îmha yê serê Rayber Apoyî nêrazîbîyayîşê xo qîrenê.

Ez zî sey wendekara cenabê to, na 15ê Sibate de vera hêrişan perwerîya xo ya seba to newe bikera û çalakîyanê xoverdayîşî yê şarê xo geş bikera. Ez wazena pê çalakîya xo mesaj bida medenîyetê sinifan û seba ke rîyakerîya Mehkemeya Heqanê Merdiman eşkera bikera verê edaletê tarîxî de biba şahîd.

Serekê mi, armancê çalakîya mi no yo ke komployê vera to û şarê kurdî qebul nêkera û vera neheqîya serê to sereyê xo wedarna, xorexneyê embazîya qelse bikera û nê hîsê şermî ra bixelisa. Xeylêk kesî vanê ke şexsê to de xeta îdeolojîke birijnê. La ez ney sey îdîayêka pûçe vînena. Çunke to hînî mezg û zerrîya bi mîlyonan merdiman de ca girewto.

To tim durîstî û perwerîya cinîyan şinasnaye ma. Ez ewro wazena rixmê pêro qelsî û kêmasîyanê xo zî qerardarîya xo ya seba paradîgmaya newîye bimojna, vera kanwazîye û hêrişanê teberî mesajê xo bida. Sey embazanê şehîdan ez zî vana ke werrekna ganê mi ra hîna ercîyaye çîyêkê mi bibîyêne û mi o seba to feda bikerdêne.

Dima ke 1999 de cenabê to amebi esîrkerdene çalakîya winasêne mezgê mi de virazîyaye. La seba ke şertî munasîb nêbîyî û beno ke ti na çalakîye qebul nêkerî mi zî mîyanê têkoşînî de waşt perwerî û duristîya xo to rê bimojna. Ez ewro zî zanena ke ti do na çalakîya ma qebul nêkerî û rexne bikerî. La ez se bikera Serekê mi? Eşqê mi wina yo. Zerrîya mi bê to û bê huyayîşê domananê erdê ma aram nêbena. Ez cenabê to ra uzrê xo wazena ke mi na bire nê prosesî de 8 serran erey daya. 

Ez wazena vaja ke ez hêvîdar û bawerîn a. Bi taybetî wexto ke cenabê to seba Komîteya Newe ra Awankerdişê PKKyî nameyê mi vat û ez pers kerda mi rûmetêko pîl û dîyarîye hîs kerde. Ez ney sey rûmetêkê pîlî vînena. Seba ke cenabê to perspektîfanê xo de şorişê Başûrî sey şorişê cinîyan ercna bawerîya mi ya seba têkoşînî zêdîyaye. Nika vera bêvengîya Başûrî ez sey cinîyêka başûrije wazena cewabêk bida. Ez zaf şay a ke  tira netîceyêka serkewte bivisna destî.

Tewr peynî de ez hesret, heskerdiş û selamê xo cenabê to rê pêşkêş kena. Serekê mi, xo vîr a mekerê; ma cenabê to ra zaf hes kenê û bêrîya cenabê to kenê.

Bi hûrmet, selam û hesrete...''