Guneşe: Ganî rêxistinê cinîyan hempar tê bigêrê

Endama Kooardînasyonê PAJK’î Şîmal Ulkem Guneşe bale ante muhîmîya xoverdayîşê hemparî ê cinîyan ser û ard ziwan ke potansîyelê serkeşîye yê cinîyan esto û cinîyî bi têgêrayîşê hemparî eşkenê ser bikewê.

Endama Kooardînasyonê PAJK’î Şîmal Ulkem Guneşe vist vîrî ke Rayberê Şarê Kurdî Abdullah Ocalanî vato rayberîya cinîyan de dewrêko newe dest pêkerd û vat xeta netewa demokratîke de çareserî mimkun a.

Endama Kooardînasyonê PAJK’î Şîmal Ulkem Guneşa ke programê  Rojeva Jin ê Stêrk TV’yî de qisey kerd nê vatî:

‘’Xoverdayîşêko rayberîya Leyla Guvene de dest pêkerd bi girdbîyayîşî vila bi û ser kewt. Cinî û probleme azadîya ci teyna  Rayber Apo vîneno. Xeta netewa demokratîke de heme rayîran ramojneno. Çareserîya netewa demokratîke çareserîya azadîya cinîyan a. Bê cinîyan çareserî nêbena. Bi sîstemê îqtîdarî problemê cînîyan nênê çareserkerdene. Bi destê îqtîdar û faşîzmî bi hezaran  serran o ke vernîya cinîyan yena girewtene. Qetilkarê cinîyan Erdogan semedê sîyasetê xo yê leymin cinîyan şuxulneno. Eke pêvînayîşê Rayber Apoyî dewam bikerê vernîya rayîrê sîyasetî abeno. Mîyanê rêxistinanê cinîyan de yewbîyayîşêkê hîsdarî esto. Rêxistinê cinîyan hetê îdeolojî ra yewbînan ra dûrî bi zî yewbînan ra nizdî yê. Waştişê înan hemeyan azadîya cinîyan a. Ganî heme rêxistinê cinîyan pêro pîya tê bigêrî. Potansîyelê ma yê rayberîye esto.’’