Komêka cinîyanê femînîstan hewteyê vîyarteyî de Colemêrg û Wan zîyaret kerd. Nînan hemşaredarî û cinîyê endamanê meclîsanê şaredarîyan zîyaret kerdî. Sekretera Platformê 'Ma do Verê Kişîyayîşê Cinîyan Bigêrê' (KCDP) Fîdane Ataselîm ANFyî rê qalê zîyaretanê kome kerd.

Fîdare pare kerd  ke nînan verê cû zî Êlih û Amed zîyaret kerdbî û vat: ''Ê zîyaretî ra dima qeyûm ame tayînkerdene. Seba xurtkerdişê zemînê têkoşînî yê bi Têgêrayîşê Cinîyan ê Kurdan û seba vervejîyayîşî qeyûman ma narey verê co da Colemêrg û Wanî. Wexto ke qeyûm tayînê Colemêrgî ame kerdene merdim vîneno ke şaredarîye hetê fîzîkî ra mîyanê ablûqayêke de ya. Ma dî ke cinîyan xo kuçeyan, waranê umûmîye ra apey anto keyeyanê xo. Qeyûmî şaristan de ters afernayo. Vera ney wayîrvejîyayîşê îradeyî girîng o.''

Fîdane îfade kerd ke wird şaristanan de zî dima ke qeyûm ame tayînkerdene hêverî qeyûman dezgehê cinîyan qefilnayê û vat: ''Qeyûman keyeyê bextwaştişî, xeta telefonî ya vera şîdetî qefilnayî. Qeyûman reyde qirkerdişê cinîyan zî zêdîyayo. Cayê cinîyan ameyî kerdene bi kursan Quranî.''

Fîdane da zanayene ke ê yewbînan ra mesuldar ê û derdê înan yew ê. Fîdane vat: ''Îqtîdar nêwazeno cinîyî bibê kerdoxê raştikênî û goreyê sînoranê xo cinîyan rê cayî dîyar keno. Sîstemê hemserekîye hetê temsîlîyetî ra nê sînorî pûç kerdî. Heqê îdareyê têdûştî yê hemserekîye bawerîyêka pîle daya cinîyan.Şaredarîyanê hemserekan de pêro çime û îmkanî bi hawayêkê têdûştî yenê vilakerdene. Têkoşînê ma yo hempar, çareserîya meseleyan û çimeyî hetê dostanê ma ra  sey xopawitişî yenê pênasekerdene. Ez zî wina fikirîyena.  La warê herêmîyî de îmkanê pîlî est ê, îmkanê îqtîdarî, wekilîya şarî est ê. Ganî ma xo ney ra nêgêrê. Ney ra zî şaristananê kurdan de newe ra destvistişê îdareyanê herêmîyan zaf girîng o.''