Gerîlayanê YJA Starî yê ke Herêmanê Pawitişî yê Medya de 8ê Adare Roja Cinayan ê Kedkaran a Dinya bi coş û moralê pîlî fîraz kerd. Şayîya ke bi merasîmê leşkerî dest pê kerde de Fermandaranê YJA Starî ra Hêzile Ozgur xîtabe gerîlayanê cinîyan kerd. Ozgura ke roja heme cinîyan ê kedkaran û xoverdayoxan fîraz kerde, wina qisey kerd:

''Seke yeno zanayene ma serrêka bi têkoşînî xo ya dima verda. Şexsê Rûkene, Sarya, Çavrê û Nûjîyanan de hememrayê ma yê şehîdî yê ke ma xeyrê têkoşînê înan emser binena jîhat kewnê 8ê Adare, ma înan bi heskerdiş û hurmetî yad kenê.

Ma bi wisarê 2022yî kewnê merhaleya muhîmî ya têkoşînî.  Şerê dinya yê hîrêyînî yo ke herêma ma de rewna dest pêkerdo û ewro xeylêk cayanê dinya ra vila bîyo, bi heme şîdetê xo dewam keno. Rîyê krîzê sîstemî ra ewro merdimîye mîyanê kaosî de ya. Heme heme her cayê dinya de bi tewiranê cîyayayn şerê pîlî estê. Her hetî ra krîzê pîlî estê. Xoza rijîyena. Dinyaya ma rîyê zîhnîyetê nêrî ra tengayî ancena. Xora naye ra tengayîya tewr pîle cinîyî ancenê. Her hetê dinya de cinîyî raştê şîdet, zext, tecawuz û qirkerdişî yenê. Vera nê hêrişan zî serewedaritişê cinîyan esto. Cinîyî têkoşîn kenê. Têna aqîlê azadîwaştoxî yê cinîyan eşkeno verê rijnayîşanê ke pê aqilê camêrdan benê bigêro.

Senî ke Rayberîye vatbi na seserre do bibo seserra têkoşînê cinsî. Têkoşînê cinîyan do sîstemanê serdestan û awanîyanê faşîstan bin bifîno. Na çarçewe de têkoşînê pîlî do Kurdîstan de bibê. Ewro gerîlayê YJA Starî vera hêrişanê dewleta tirke yê vera şarê ma têkoşîno tarîxî danê. Komployê vera Rayberîye yo ke mîmarê nê têkoşînî yo, reya diyînî binkewt. Bi tecrîdê Îmraliyî û hêrişê vera waranê gerîlayan yeno waştene ke kurdîya azade û cinîya azade bêrê qedînayene. Şexsê Kurdîstanî de vera merdimîye hêriş yeno kerdene. Têkoşînê Kurdîstanî têna semedê kurdan nîyo. Şexsê gerîlayan ê cinîyan de têkoşînê cinîyan ê dinya yeno hedefgirewtene. 2021 de no têkoşîn şexsê Nûjîn, Çavrê, Delale û Rûkenan de resa serpilikî.

Dewleta tirke ya faşîste çend şino şîdetê xo yê vera cinîyan zêdînena. Senî ke ma par hêrişê înan pûç vetî emser zî am do bi têkoşînî heme hêrişanê înan pûç vejê. Ma so waştişê şehîdanê xo yê qehremanan bîyarê ca. Ma qerardar ê ke semedê pawitiş û averberdişê kulturê komelî yê tebîî ma do têkoşînê xo xurtêr bikerê. Semedê azadîya Rayber Apoyî berpirsîyarîya ma cinîyan zaf a. Ma her roje holêr fam kenê ke Rayberîye semedê xelisnayîşê cinîyan senî game muhîmî eştê. Coka azadîya fîzîkîye ya Rayberîye yena manaya serkewtişê xeylêk têkoşînan.  Heme cinîyê ke wazenê bibê azad ganî dormeyê Rayber Apoyî de bibê çember. Ganî ma emser azadîya fîzîkîye ya Rayber Apoyî tacîdar bikerê. No wezîfeyê ma yo tewr muhîm o.

Paştîya ma  ma ra pêt a, ma do ser bikewê. Tewirê embaze Semaya ke xo kerd pirdê serkewtişî yê mabênê 8ê Adare û 21ê Adare, ma rê do bibo serkêş. Reyna embeze Sakînaya ke têkoşînê şorişgerî yê nêm seserrîye de semedê xelisnayîşê cinîyan bi hezaran pêrodayîşî kerdî do rayîr bimejno ma. Ma do rêçê nê embazan û cinîyan ê xoverdayoxan ê ke sey înan de ser bikewê. Bi na wesîle ez reyna 8ê Adare heme embazan û cinîyan ê xoverdayoxan rê fîraz kena, bi hêvîya resayîşê azadîye heme xoverdayoxan selam kena. Ma reyna vanê biciwîyo Rayber Apo, cinî, cuye, azadîye.''