Komeleya Cigêrayîş, Kultur û Ziwanî ya Mezopotamya (MED-DER), PENê Kurdan, Komeleya Edebîyatkaranê Kurdan, Federasyonê Komeleyanê Paştdayîş û Huqûqî yê Keyeyanê Tepişteyan û Hukmwerdeyan ê MEDî (MED TUHAD-FED), Komeleya Cinîyan a Rosa, Komeleya Huqûqnasanê Seba Azadîye (OHD), Komeleya Cigêrayîşanê Kurdan û Merkezê Heqanê Cinîyan ê Baroyê Amedî bire daye ke hîkayeyê ke cinîyan ê tepişteyan nuştbî sey kitabî biweşanê.

Rêxistinan baxçeyê MED-DERî de Amed de eşkerayîye ameye dayene.

Hemsereka MED-DERî Şîlane Elmaskan îfade kerd ke zîndanan de cinîyê tepişteyî îşkence vînenê, yenê qirkerdene û vat: ''La rixmê ney zî nê cinîyî xo ver danê û seba kurdkî têkoşîn kenê. Kitabê ke cinîyan ê tepişteyan nuştbî ameyî vînîkerdene. Cinîyan xîretêkê pîlî ra dima nê kitabî vetî teber. La reyna zî weşanxane û komeleyan de nê kitaban rê astengîye yena vetene.''

Elmaskane da zanayene ke ê armanc kenê ke hîkayeyanê ke cinîyan ê tepişteyan nuştbî arê bidê û biweşanê. Elmaskane vat: ''Coka ma wazenê ke wa cinîyê tepişteyî hîkayeyanê xo ma rê bierşawê. Cinîyî eşkenê heta 8ê adare eşkenê MED TUHAD-FEDî rê hîkayeyanê xo bierşawê. Nê hîkayeyî binê nameyê 'Hîkayeyê Cinîyanê ke Zîndanan de Xo Ver Danê' do biweşanîyê.''