Hemvervatoxa  Kongreya Şaran a Demokratîke (HDK) Fatma Kiliçarslana ke bi wesîleya nêzdîbîyayîşê 25’ê Kanûne, derheqê şîdetê serê cinîyan û xoverdayîşê cinîyan de qisey kerd bale ante paştgêrîya dewlete ya camêrdî ser.

Kiliçarslane ard ziwan ke ê bi wesîleya 25ê Teşrîna Peyêne Roja Mucadaleyê Mîyanneteweyîye ya Vera Şîdetê Serê Cinîyan ê pîya bi xeylî rêxistin û platformanê cinîyan çalakîyanê hemparî do vîrazî û va: ‘‘Ma nika ra her ca de dest bi amadekarîya  çalakîyan kenê. Cinîyî dibistane, kuçe, keye, meclîs her ca de estê û do her ca de wayîrê heqanê xo bivejîyê vera îqtîdar, dewlete û camêrdan vengê xo berz bikerê.‘‘ 

Kiliçarslane vist vîrî ke Tirkîya rixmo ke pêkerdişê Stenbolî mor kerdo qaydanê ci ca nêana û va: ‘‘Xoverdayîşê cinîyan rixmê heme hêrişan çend şino xurt beno.  Cinîyî nika her cayê cuya de qîrênê û vanê ma estê. Zîhnîyeto serdest ê camêrdî naye ra terseno û pêkerdişê Stenbolî yo ke heqanê cinîyan paweno qebul nêkeno. Camêrd cinî qetil keno û hukmo camêrd qetilkarî paweno. Pawitişê qetilkarê akademîsyene Ceren Damar Şenele de no eşkera yeno vînayene. Vano ‘ma pêsere nêkerd mi kişt‘ wazeno ke qetilkerdişî sey çîyêkê meşrû ramojno. Heta ke dewlete  gamêk meerze do qetilkerdişê cinîyan dewam bikerê. Ma do heme qetilkerdişê cinîyan teqîp bikerê. Cinîyî tewirêko polîtîk ramojnenê. Ganî no xoverdayîş nêvînayîş ra mero vînayene. Cinîyî her ca de vera şîdetî sere wedarenê. Ma do her ca de xoverdayî xurt bikerê  û destkewteyanê xo camêverdê.‘‘