Endama Meclîsê Cinîyan ê HDPyî Lemane Kîraz derheqê polîtîkayanê dewlete yê vera cinîyan de ANFyî rê qisey kerd.

Kîraze da zanayene ke dima ke Peymana Îstanbulî ameye betalkerdene seba cinîyan warêko bêasayî virazîya û vat: ''Îqtîdar û dewlete heq û waştişanê cinîyan marjînal mojnenê. Cinîyî tewr zaf zereyê keyeyî de hetê merdimanê xo ra kişîyenê. Prosesê janî de cinîyî mehkumê keyeyî ameyî kerdene. Ney zî şîdetê vera cinîyan zêdîna. Bi betalkerdişê Peymana Îstanbulî zî seba cinîyan warêko bêasayî ronîya. Cinîyî nêeşkenê muracatê Keyeyanê Paştdayîşî yê Cinîyan, Merkezê Çimdarîye û Vergirewtişê Şîdetî bikerê. Nê cayan de xizmet û tedbîrê qîmî çin ê.

Krîzo ekonomîk û xizanîye zî tewr zaf tesîrê cinîyan kenê. Seba cinîyan yan zî şîdetê vera cinîyan budçeyêke nêna viraştene. Îqtîdar xora nêwazeno cinîyî bixebitê tewrê ekonomî bibê. Îqtîdar seba ke teng bîyo şino serê kurdan, cinîyan û HDPyî. Çunke têna nê îqtîdarî rê muxalefet kenê. Îqtîdar cinîyan sey gefêk vîneno û vera cinîyan polîtîkayanê teda ano ca. Seba ke ma sîstemê bêedalet û tekperestî bivurnê ganî îtîfaq û têkoşînê cinîyan pîl bikerê. Ma sey cinîyan do seba azadîye, edalet û têdûştîye sîstemî bivurnê û qetî do ser bikewê.''