19ê nîsana 2016î de taxa Xaçortê ya qezaya Rêya Armûşî ya Wanî de polîsanê tirkan Remzîye Bora 27 serre pê guleyan kiştbî. Serdozgerîya Komare ya Wanî îdîanameyê tehqîqatî ser o vat 'hewce nêkeno' û dosyaya derheqê polîsê kiştoxî de qefilnaye.

Serdozgerîya Komare ya Wanî û Mehkemeya Cezaya Sulhe ya Wanî  bi îdîaya 'dibare bîye' dosya qefilnaye, keyeyê serebûtî de cigêrayîşêk nêkerd, avûkatî daxîlê keşfê cigêrayîşî zî nêameyî kerdene. Tesbît nêbi le Remzîye pê guleyê kamyew polîsî kişîyaye. Dosya pê bahaneya 'çalakîya rêxistine ra merde' qefilîyaye.

Merdimanê Remzîye muracatê Mehkemeya Qanûnê Bingeyî kerd.

Avûkatanê keyeyê Remzîye ra Veysî Guneşî derheqê babete de agahîyî dayî û pare kerd ke serebût erzîya milê PKKyî û vat: ''Seba ronîkerdişê serebûtî 5 serran de çîyêk nêame kerdene. Çend serrî yo semedo ke tedbîrî nênê girewtene cinî û domanî mîyanê pêkewtişan de manenê û kişîyenê. Seba ke serebûtê Remzîye Bor nêro mîyankerdene destê ma ra çita bêro ma do bikerê. Ma do muracatê Mehkemeya Qanûnê Bingeyî bikerê.''

Veysî Guneşî ard ziwan ke ganî serebûtê winasênî bêrê roşnîkerdene û ê pabeyê paştdayîşê komelî yê. Guneşî vat: ''Wa no kiştiş nedîyar nêmano.Mekanîzmayê dewlete û hêzê asayîşî pê mîyankerdişê nê serebûtan benê sebebê mergî.''