Komelgehê Cinîyan ê Rojhelatê Kurdîstanî (KJAR) mabênê 7-9ê gulane de kongreya xo ya çarine koyan de kerde. 

Kongre de 6 rojdemê bingeyîyî ameyî ercnayene ke nê yê; rewşa Rayberê Şarê Kurdî Abdullah Ocalanî, Şorişê Jin, Jiyan, Azadî, karê rêxistinîye, karê xopawitişî, plan û birî û weçînayîşê Heyetê Îdareyî yê KJARî. 

Kongre de Koordînasyonê KJARî ra Denîze Derya qisey kerd û ard ziwan ke ê kongreya xo dîyarîya Rayberê Şarê Kurdî, pêro cinîyan û şarê kurdî kenê. Denîze Derya şehîdê têkoşînê azadîye zî yad kerdî û pare kerd ke ê do bi destekê cinîyan xebatanê xo tim aver berê.

Dima kongre de rojdemê bingeyîyî ameyî nîqaşkerdene. 

Kongre de nê birî ameyî girewtene û nê planî ameyî viraştene:

''-Têkoşînê seba azadîya Rayber Apoyî do bibo çimeyê pêro xebatanê ma.

-Têkoşînê vera sîstemê dişmenê cinîyan hedefê ma yo bingeyî yo.

-YJCR seba rêxistinkerdiş û xopawitişî do xo biresno pêro cinîyan ê ciwanan.''

Roja peyêne ya kongre de Heyetê Îdareyî rê 15 endamî ameyî weçînayene.

Hemsereka PJAKî ya verêne Zîlane Vejîn roja peyêne qisey kerd û vat: ''Ma kongreya xo bi serkewtişî viraşte û birî girîngî girewtî. Serkewtiş bi yewîya cinîyan do mumkîn bibo. Coka ma venga pêro cinîyanê Rojhelatê Kurdîstanîş û Îranî danê ke binê sîwana KJARî de bingeyê felsefeya Rayber Apoyî de bêrê ma pîya têkoşîn bikerê.''

Kongre bi slogananê sey “Bijî Serok Apo, Bê Serok jiyan nabe”, “Jin Jiyan Azadî” û Şehîd Namirin” qedîyaye.