Koordînasyonê Komalanê Cinîyan ê Kurdîstanî (KJK) bi wesîleya 8ê Adare Roja Cinîyan ê Kedkaran a Dinya eşkerayîyêka nuştekîye weşanaye. Eşkerayîye wina ya:

''Bi wesîleya 8ê Adare Roja Cinîyan ê Kedkaran a Dinya ma pêro cinîyanê ke vera hişmendîya serdestîya camêrdan û sîstemê ci yê kolonyalîstî xo ver danê selam kenê.

Têkoşînê ma yê azadîya cinîyan Sarayan ra heta Rosayan, Leylayan ra heta Berta, Denîze û Meenayan bingeyê ked, fikr, xoverdayîş û vîrameyîşê cinîyan de geş beno û reseno asta şorişê cinîyan.

Kurdîstan de par embazê ma yê cinîyî Sosine Bîrhat, Nûjîne Amed, Tolhildane Raman, Sozdare Cûdî û Şîlane Goyî hêrişanê qirkeran de ameyî qetilkerdene. Şexsê nê embazan de ma pêro embazanê xo yê şehîdan yad kenê û soz danê ke do hesreta înan bîyarê ca. Ma Rayber Apoyî selam kenê, hêzanê komplogeran nalet kenê û anê ziwan ke heta ke sîstemê Îmraliyî parçe bikerê têkoşînê xo rê dewam bikerê.

No proses mojneno ke esasê têkoşînê azadîya cinîyan de cuya azade eşkena bêra caardene. Têna Kurdîstan û Rojhelatê Mîyanênî de nê her cayê dinya de şer, îşxal, milîtarîzm, polîtîkayê koçberîye, şîdet, xizanîye, qirkerdişê xoza estê. Nê çîyî bingeyê sîstemê serdestîya camêrdan de yenê kerdene. Peynîya seserra 20. de Rayber Apoyî seba seserra 21. vatbi 'Do biba seserra azadîya cinîyan' ewro her cayê dinya de hetê têkoşînê cinîyan ra yena, şar û hêzê demokrasî her wextî ra zêdêr wayîrê ci vejîyenê. Ewro têkoşînê azadîya cinîyan rayberîya têkoşînê demokrasî, ekolojî û azadîye keno û pêro têkoşînê vera sîstemî temsîl keno. Coka ganî têkoşînê azadîye yê cinîyan bibo hêzo stratejîk o bingeyî yê pêro têgêrayîşanê komelkîyan û bireso asta rêxistinbîyayîşî.

Seba ke asta xo ya rêxistinîye xurt bikerê û vera hêrişanê faşîstan û serdestîya camêrdan têkoşînê azadîya cinîyan gel bikerê ma Hemleya 'Vera qirkerdişê cinîyan, wext wextê pawitişê cinîyan û komelê azadî yo' daye destpêkerdene. 8ê Adare reyde ma do hemleya xo biresnê asta tewr berze. Sebebê ney zî zaf ê; Kurdîstan de yeno waştene ke pê hêrişan û serdestîya camêrdan destkewteyê cinîyan bêrê çinkerdene, polîtîkayê tacîz, tecawuz, suîkast, qirkerdiş yenê caardene. Qirkerdişê Denîze Poyraz, Garîbe Gezer, Aysele Tugluk û Zeynepe Celalîyan sere de cinîyan ê xoverdayoxan ê zîndanan rê îşkence yeno kerdene. Ganî ma vera nê hêrişan xo rêxistin bikerê û xopawitişê xo bîyarê ca. Komelêko rêxistinkerde eşkeno estbîyayîşê xo bipawo û azadîya xo bîyaro ca.

Heto diyîn o stratejîk ê hemleya ma no yo ke sere de vera rejîmê AKP-MHPyî vera hêzanê kapîtalîstan cuya azade bipawa. Rojawan, Mexmûr û Şingal de hêrişê qirkerdişî zêdîyayî. Hêzê hegemonya yê globalî û hemkarê ci seba ke kurdî îdareyê xo awan nêkerê pîya xebitîyenê. Coka xopawitiş wezîfeyo tarîxî yê cinîyan o. Ma bi wesîleya 8ê Adare reyna pare kenê ke qetî cuya azade ra fek vera medê. Ma venga pêro beşanê têgêrayîşê xo yê konfederalî danê le wa têkoşînê cinîyan ê azadan û komelî geşêr bikerê.

Heto bîn o stratejîk ê hemleya ma zî no yo ke ganî azadîya Rayber Apoyî bêra caardene, sîstemê Îmraliyî bêro parçekerdene. Ma 15ê Sibate de vejîyayî meydanan. Vera Komployê Mîyanneteweyî ma dêsanê Îmraliyî parçe bikerê, sîstemê tecrîd û îşkenceyî wedarnê û azadîya Rayberîya xo bîyarê ca. Bi nê hawayî ma hemleya xo geş bikerê. Wext wextê azadîye yo!

Ganî camêrdî zî awankerdişê cuya azade ya demokratîke de xo bivurnê. Ganî camêrdî zî xo feraset, hiş û tewirê serwer, îqtîdarperest û kolonyalîstî ra bixelisnê. Ganî felsefeya 'kiştişê camêrdê serdestî' yê Rayber Apoyî tewrê cuye bêra kerdene û nê esasî ser o camêrdî nêzdîyê 8ê Adare bibê.

8ê Adare ganî hetêkî ra sey roja geşkerdişê têkoşînê vera faşîzm, ferasetê serdestîya camêrdan biba û hetê bînî ra zî ganî sey rêxistinkerdiş, afernayîşê waranê cuya azade û awankerdişê sîstemê cinîyan bêro famkerdene. Ma 8ê Adare sey komelkîkerdişê Hemleya 'Vera qirkerdişê cinîyan wext wextê pawitişê cinîya azade û komelî yo' pêşwazî bikerê û sey menga xoverdayîş, hêvî û azadîye bivînê. Ganî 8ê Adare ra heta Newroze bi rengê şorişê cinîyan pirdêk virazîyo û na serre bêra kerdene serra xoverdayîş û azadîye.''