Koordînayonê KJKyî ke derheqê 25ê Teşrîna Peyêne Roja Têkoşînê Vera Şîdetê Serê Cinîyan a Mîyanneteweyîye deklarasyonêk weşana û nê pare kerdî:

''Ma yew dewr de yê ke vera cinîyan şerêko bêname yeno kerdene. Her roje bi seyan cinîyî hetê camêrdan ra yenê mirênayene. Her deqa de bi desan cinîyî raştê tecawuz û tacîzî yenê. Her sanîye de cinîyê bêhûmare raştê şîdetî yenê. Peyê naye de zîhnîyetê camêrdê nîjadperest-serdestî esto. Nê zîhnîyetî ke xo sey sîstemêkê unîversalî rêxistin kerdo her hetî ra hêrişê cinîyan keno. Têna bi têkoşînê radîkalî ma eşkenê verê nê şîdetê serê cinîyan bigerê. No şîdeto ke 5 hezar serran ra nata dewam keno, çend şino qirrika ma pêşeno, ma bênefes verdeno. Ma hîna nêeşenê wina biciwîyê. Bes o!  Wextê ci ameyo ke ma şîdetê nêrî qoqê ci raqilnê û bierzê!

Senî ke wayanê Mîrabalan 60 serrî verê cu têkoşîn kerd ewro zî her hetê dinya de cinîyî vera îqtîdarê faşîst nêrî xover danê. Kurdîstanî ra heta Filibinan, Brezîlya ra heta Macarîstan cinîyê têkoşînê cuya azade rê serkêşîye kenê. Coka raştê zextan tewr pîlan û şîdetê bêsînorî yenê. Cinîyan ê serkêşan hedef genê ke têkoşînê komelkî bişiknê. Kobanê de temsîlkarê têgêrayîşê cinîyan ê kurdan Zehra Berkel, Hebûne Mela  Xelîl û Emîne Weysî hêrişê suîqestî yê tirkan de ameyî şehîdkerdene. Reyna endama Konseya Rayberdişî ya ma Leyla Wan hetê artêşa tirke ra bi hedefgirewtişî ameye qetilkerdene. Meksîka de hemşaredare Florisel Rios hetê çeteyan ra ameye remnayene û mirênayene. Reyna Kolombîya, Amerîka û xeylêk cayanê bînan de cinîyê xoverdayoxî ameyî qetilkerdene ke verê têkoşînê înan bêro girewtene.

Cinîyê ke rixmê heme hêrişan çok nêdanê û têkoşîn kenê, ma têkoşînê  înan selam kenê! Cinîyê ke çar leteyanê Kurdîstanî de vera şîdetê camêrd-dewlete xo pawenê û tewrê hamleya ma 'Vera Qirkerdişê Cinîyan Wextê Pawitişê Cinîya Azade û Komelî yo' benê, ma înan zî selam kenê! Cinîyê ke Fîlîstîn de vera îşxalî herra xo pawenê, cinîyê xoverdayoxê ke vera pandemîya qirkerdişê cinîyan bi vatişê Ni Una Menosî waşt ke qetilkarî bêrê cazakerdene û wayê ma yê ke Amerîka de têgêrayîê Black Lives Matterî rê serkêşîye kenê ma înan selam kenê! Têkoşînê şima yê ma yo, têkoşînê ma yê şima yo! Ê ma hemeyan o!  Bêrê ma bibê yew!

Rejîmê AKP-MHPyî Kurdîstan û Tirkîya de vera îradeyê cinîyan şerêkê sîstematîkî rayra beno. Bitaybetî Kurdîstan de dewleta tirke zere û teberê sînorî de polîtîkaya şerî ya taybete rayra bena. Cinîyê sîyasetmedar û aktîvîstî yenê destbendkerdene û tepiştene, cinîyî yenê tecawuzkerdene û qetilkerdene. Rojawan de bajarê ke îşxal kerdî de cinîyî sey kole yenê rotene. Cinîyan ê serêkşan rê suîqestî yenê kerdene. Tirkîya xora Pêkerdişê Îstanbulî ke nêana ca wazenê morê xo binê ci ra bianco. Heta ewro têkoşînê cinîyan ê Kurdîstan û Tirkîya ra nêşekayî morê xo peyser biancê.

Têkoşînê cinîyan çend şino pîlêr beno û ser keweno. Arjantîn de bi xoverdayîşê cinîyan heqê kurtajî agêra parlamento. Amerîka de destur cinîyan nêda Trumpo newe ra bibo serek. Belarus de netîceya têkoşînê ke cinîyî serkêşîya ci kenê de meşruyetê îqtîdarê dîktator Lukanşenkoyî nêmend. Polonya de cinîyî payan ser ê. Eke ma hêzê xo bikerê yew û pîya têkoşîn bikerê destkewteyê ma hîna xurt benê. Coka ma hemleyêke daye desptêkerdene. Ma bawer kenê ke cinîyî 25ê Teşrîna Peyêne de do hemleya ma bikirişê merheleyêka corîne. Reyna ma veng danê heme cinîyan ke wa paştî bidê têkoşînê ma yê semedê azadîya  Rayber Apoyî ke verê cinîyan akerd.

Xopawitişo tewr pîl ê cinîyan afernayîşê waranê cuya azade yo. Coka ma roja 25ê Teşrîna Peyêne de têkoşînî pîl bikerê. a vera qirkerdişê cinyan cinîya azade û komelê azadî bipawê, cuya azade ronê! Kurdîstanî ra heta Meksîka, Fîlîstînî ra heta Polonya, Amerîka ra heta Hîndîstan û wetê ci ma pêro pîya biqîrê: Cinî Cuye Azadîye.''