Koordînasyonê KJKyî derheqê tecrîdê Îmraliyî, dewaya vera HDPyî, Newroze û wedaritişê Peymana Îstanbulî de eşkerayîyêke daye.

Eşkerayîye wina ya:

''Sere de cinîyan şarê ma hêrişanê bêemanan reyde Newroze pê coşî fîraz kerde. Warê Newroze de qerardarîya azadîye, tewirê xoverdayîşî û hêzê vera faşîzmî ameyî mojnayene. Şarê ma mojna ke wayîrê şehîdanê xo, erjanê têkoşînî û Rayberê xo vejîyeno. Faşîzmê AKP-MHPyî zî rê ame mojnayene ke ê nêeşkenê nê şarî bifatisnê.

Dewlete pê hêrişanê faşîstan wazena şexsê cinîyan têkoşînê şaran asteng bikera. Çimeyo ke hîşmendîya azadîye û îradeyê azadîye awan kerde û payan ser o vindarnaye Rayber Apo yo. Coka dewleta tirke verî hêrişê Rayber Apoyî kerd, Komployo Mîyanneteweyî ard ca û Zîndanê Îmraliyî awan kerd. Bi nê hawayî verê kerdiş û hêrişan ame akerdene, pê raştîya pragmatîst, înkardar, talanker û qirkerî yê koma cerge ya Erdogan-Bahçelîyî hêrişî resayî astêka pîlêre.

'Heta ke Rayber Apoyî ra xebere bigêrê ganî ma têkoşîn rê dewam bikerê'

Gef û tehlukeyê pîlî yê vera Rayber Apoyî, hêrişê vera averşîyayîşê azadîya cinîyan, çinkerdişê zemînê sîyasî yê kurdan, tepiştişê bi hezaran kurdan, tepiştişê komelî, destsernayîşê heqaê cuye yê komelî, bênasnamekerdişê cinî û ciwanan ma rê yenê ferzkerdene. Vera nînan ganî pê îradeyê 8ê Adare û Newroze tewir bêro mojnayene û têkoşîn heta ke netîce bêra girewtene dewam bikera. Heta ke Rayber Apoyî ra agahî bêra girewtene û sîstemê îşkenceyê Îmraliyî bêro rijnayene ganî têkoşîn pê ruhê xoverdayîşî yê Newroze bêmabên dewam bikero û kes xo teberê têkoşînî de nêverdo. Na mesuldarîya tarîxî ya.

'Ganî ma tewirê heybetînî yê Newroze mîyanê temamîya serre de vila bikerê'

Tek alternatîfê cuye yo ke seserra 21. de bingeyê paradîgmaya Modernîteya Demokratîje ser o ronîya rayberîya cinîyan de têkoşînkerdiş o.Hêrişê vera Rayber Apoyî hêrişê vera nê sîstemê alternatîfî yo ke bingeyê azadîya ma, estbîyayîşê ma ano ca. Ya ma do hêrişanê vera Rayber Apoyî çin bikerê û bingeyê azadîya ey de azadîya xo bîyarê ca yan zî ma do vera polîtîkayanê faşîstan tim maruzê kiştişan bimanê. Asta nikayêne de mesuldarîya cinîyan, şarê ma û terefgîranê azadîye ya ke no werte ra wedarê, pê têkoşînêkê bêmabênî cuyêke serê bingeyê krîteranê azadîye awan bikerê. Wextê ci ameyo ke ma tewirê heybetînî yê Newroze mîyanê temamîya serre de vika bikerê, pêro meydanan bikerê meydanê têkoşînî û bingeyê hêzê xo ser pê azadîya Rayberîye ameyoxê xo awan bikerê.

'Ganî ma bi her hawayî vera tecrîdî, hêrişan û faşîzmî wurzê payan ser'

Na Newroze de yeno waştene ke zemîno sîyasî yê kurdan bêro qefilnayene. No zî yeno a mana ke vera kurdan şerêk ameyo îlankerdene. Pê tedaya 'Ya ti do pê teslîmîyet bimire yan zî raşta zî bimire' tewirêko winasên yeno mojnayene ke qet asan nîyo. Ewro Rayber Apoyî rê gefî yenê wendene, koyê Kurdîstanî dîyenê bombayan ver û partîyê kurdan yenê hedefkerdene. Bêguman ma do vera nînan pê pêro hêzê xo wurzê payan ser.

Nê esasî ser o ganî rayberîya cinîyan de pêro şarê ma vera nê hêrişan xo rêxistin bikerê û pê tecrubeyê têkoşînê 50 serran pê hişmendîya 'şaro rêxistinbîyaye do azad bibo' têbigêro. Ma do seserra 21. de rayberîya cinîyan de şoriş bîyarê ca. Coka ganî nê esasî ser o her kes tewrê prosesî bibo, tewrê têkoşînî bibo, vera sîstemê serdestîye yê camêrdan tewir bigêro. Ganî çarçewa nê têkoşîn û rêxistinbîyayîşî de ciwanî bihêrîkê koyan. Armanco verên ê na serre yo ke ma azadîya Rayber Apoyî bîyarê ca û bi nê hawayî Newroza 2022î bikerê serra binkewtişê Dehaqan.

Dewleta cergan a Erdogan-Bahçelîyî goreyê tesbîtê 'nêzdîbîyayîşê vera cinîyan nêzdîbîyayîşê vera komelî yo' asta polîtîkayanê vera kurdan, şar û komelê Tirkîya pê nêzdîbîyayîşê xo yê vera cinîyan eşkera kena. Dewlete Vakurê Kurdîstanî de dezgehê cinîyan qefilnena, cinîyan tepişnena û erzena zîndanan, ceza nêdana îstîsmarkeran, îstîsmarê domanan kena meşrû. Wedaritişê Peymana Îstanbulî zî netîceya nê polîtîkayan a. Mesele têna meşrûkerdişê şîdetê vera cinîyan nîya. Mesele newe ra ferzkerdişê koledarîye yo.

Hêrişê vera Peymana Îstanbulî hêrişê vera Rayberîye û têgêrayîşê azadîye yê kurdan ê

Ganî nêzdîbîyayîşê îqtîdarî yê vera Peymana Îstanbulî hêrişanê vera Rayberîye û têgêrayîşê azadîye yê kurdan ra cîya nêro ercnayene. Dewleta cergan a Erdogan-Bahçelîyî xîret kena ke şexsê Rayber Apoyî de çimeyê azadîye yê şaran wişk bikera, têkoşînê têgêrayîşê azadîye bişikna û 'cîyakerîye' bikera nasnameyê cinî û camêrdan. Coka ganî cinîyê Tirkîya û pêro dormeyê demokratîkî cinîyan ê kurdan û şarê kurdî reyde têkoşînê xo bikerê yew.Têkoşîn û rêxistinîya hempare ya cinîyan eşkenê heqê hêrişanê sîstemê serdestîya camêrdan ra bêrê. Ma çalakîyanê vera wedaritişê Peymana Îstanbulî selam kenê. Ma pê bawer ê ke têkoşînê cinîyan do mende û xurtêr bibo.

Ma venga pêro cinîyan danê ke nê esasî ser o xo rêxistin bikerê, têkoşîn pîl bikerê, têkoşînêkê hemparî bîyarê ca, tradîsyonê serwerîya camêrdan şexsê dewleta cergan a Erdogan-Bahçelîyî de çin bikerê û welatê xo, herêma xo, dinya pê nameyê cinîyan bixelisnê.

Şehîdê ma yo pîl, embazê ma Mahsûm Korkmaz (Agît) 28ê adara 1986î de şehîd bi. Embazê ma Mahsum Korkmaz û bi hezara şehîdê ma yê cinîyî û camêrdî bîyî erjê pîlî yê komelê azadî, bîyî tewirê çinkerdişê koledarîye. Bi na wesîle ma sere de embaz Agît pêro şehîdanê xo pê rêz û rûmetî yad kenê, vanê ke ma do têkoşînê xeta Agît û Zîlane biresnê serkewtişî.

Nê esasî ser o ma reyna venga pêro cinîyan danê ke asta rayberîya tesîrîne de pê çêrîya têkoşînî ya pîle û rûmetê ci têbigêrê, ma venga şarê xo û pêro dormeyanê demokratîkan danê ke wa bi xurtî tewrê nê şorişî bibê. Cuye û azadîya Rayber Apoyî caardişê ameyoxê cinî û şaran o. Pê qerardarîya çinkerdişê faşîzmî, pê qerardarîya rayberîya xurte ma cinîyan, şarê xo, şaran bi rêzdarî selam kenê û înan rê serkewtiş wazenê.''